Los die speelgoed-wapens, vra veldtog
2009-11-16 22:37
Speelgoedvuurwapens lyk al hoe meer soos die ware Jakob.
In so ’n mate dat dit toenemend in rooftogte gebruik word.
Die organisasie Gunfree South Africa (GFSA) het handelaars wat speelgoedvuurwapens aanhou daarom gevra om dit van winkelrakke te verwyder.
“Ons vra kinders om hierdie speelgoed in te gee en ons vra ouers om dit nie as Kersgeskenke te koop nie,” sê me. Natalie Jaynes, Wes-Kaapse direkteur van GFSA.
As deel van ’n spesiale veld- tog met die oog op speelgoedverkope wat oor Kersfees toeneem, het GFSA al sowat 5 000 speelgoedvuurwapens ingesamel, sê Jaynes.
“Ons glo in ’n land soos Suid-Afrika wat deur misdaad getraumatiseer word, is dit noodsaaklik om vreedsame speletjies aan te moedig. Ons wil die boodskap aan kinders oordra dat vuurwapens nie pret is nie.
“Ouers dra teenstrydige boodskappe aan kinders oor as hulle vir hulle sê om weg te bly van regte vuurwapens, maar dan vir hulle speelgoedwapens gee om mee te speel.
“Wanneer ’n ouer ’n speelding aan ’n kind gee, neem die kind aan die ouer keur die speelding goed.”
Jaynes sê kinders “oefen” situasies. “Deur te speel oefen hulle om volwassenes te wees deur goed te gebruik wat volwassenes gebruik. Wil ons regtig hê hulle moet geweld oefen?”
Tot dusver, sê Jaynes, is Pick n Pay die enigste handelaar wat die veldtog steun.
Me. Tamra Veley, ’n woordvoerder van Pick n Pay, sê dié winkels verkoop net watergewere omdat dit nie vir vuurwapens aangesien kan word nie en “onskuldige pret” is.
Sy sê Pick n Pay het jare gelede besluit om nie speelgoed aan te hou wat vir vuurwapens aangesien kan word nie