Lugmag: ‘JZ-vlug nié weer vergesel’

Me. Lindiwe Sisulu, minister van verdediging, sal vandeesweek met die hoofde van die weermag en die lugmag vergader om die BBP-vlugte-debakel te bespreek.

Die lugmag het haar egter verseker dat die omstrede reis van pres. Jacob Zuma New York toe, waartydens twee skadu-vliegtuie teen miljoene rande sy vliegtuig vergesel het, die laaste een is waartydens sy Boeing-sakestraler vergesel sal word.

Mnr. Ndivhuwo Mabaya, Sisulu se woordvoerder, het gesê die lugmag wou geen kans waag dat Zuma nié vir die Verenigde Nasies (VN)-vergadering in New York sou opdaag nie.

Dit was boonop die eerste vlug met Zuma aan boord van Inkwazi, sy straler, ná ’n groot diens waartydens daar ook versienings binne-in die vliegtuig in Switserland gedoen is.

“Dít is waarom Inkwazi eers tot op Las Palmas en later weer terug van New York af vergesel is,” het Mabaya gesê.

Hy kon nie sê waarom die Airbus A340-211 van die Suid-Afrikaanse Lugdiens, wat tot op Las Palmas in die Kanariese Eilande gevlieg het, nie die volle reis kon meemaak nie.

Ook nie waarom dit nodig was om ’n Bombardier Global Express XRS New York toe te stuur net om Zuma terug huis toe te vergesel nie.

’n Bohaai oor die vlugte het verlede week losgebars nadat die ministerie aanvanklik gesê het die vliegtuig is net tot op Las Palmas gevolg.

Vrydag het lt.genl. Carlo Gagiano, lugmaghoof, egter erken dat daar ook ’n skadu-vliegtuig van New York af saam gevlieg het.

Die verwarring oor die vliegtuie was volgens hom weens ’n kommunikasiegaping tussen hom en Mabaya.

Volgens mnr. Helmoed-Römer Heitman, militêre kenner, is dit verstaanbaar dat daar verlede jaar, terwyl die presidensiële straler versien en huurvliegtuie vir Zuma gebruik is, skadu-vliegtuie gebruik is.

Tóé was die verskoning dat daar wantroue was teen die vliegtuie se betroubaarheid, maar nou is daar glo ook wantroue teen die lugmagstraler.

“Dit lyk op die oog af of daar oorboord gegaan is met die beplanning.

’n Mens weet egter nie wat die opdrag met die taking van die vliegtuie vir die reis was nie.

As dit was om die president te alle koste betyds en sonder enige vertragings in New York te kry, het die lugmag dit waarskynlik vertolk dat bystandsvliegtuie die heeltyd beskikbaar moes wees om vertragings te voorkom.”

Volgens Heitman het die lugmag nie tans ’n behoorlike bystandsvliegtuig in sy vloot nie.