Maak verskil in armes se lewe: Stort koud
2010-01-29 00:44
“Ek + Koue Stort = Liefdadigheid!”
Dít is die naam van ’n Facebook-groep wat Jong Pretoriase Christene vandeesweek begin het en wat gistermiddag al sowat 200 lede gehad het.
Die gedagte het Sondagaand by die NG kerk Lynnwood ontstaan nadat van die jongmense geluister het hoe ’n student vertel van hul projek om vanjaar eenvoudig te leef en uit te reik na mense in nood. Van dié jongmense het besluit om vanjaar koud te stort.
Ná die diens het mnre. Ruan Jansen van Rensburg, Michiel Claassen en me Ané Kotzé, drie studente, besluit hulle gaan ook vanjaar koud stort.
Hulle het ’n Facebook-groep gestig en al hoe meer maats is besig om by hulle aan te sluit.
Op Facebook verduidelik hulle dat 70% van die Suid-Afrikaners wat stort, dit in koue water doen. “Nie omdat hulle dink dis oulik of romanties nie. Nee. Vet nee.”
Hulle het besluit om deel te word van die statistieke sodat hulle besef wat dit beteken wanneer hulle bid: “Seën dié wat nie so bevoorreg soos ons is nie.”
Mnr. Skillie Botha, teologiestudent wat by hulle aangesluit het, sê die koue stort self gaan nie ’n verskil aan armes se lewens maak nie. Dit gaan egter vir elkeen wat deelneem ’n daaglikse herinnering wees aan hoeveel hulle het om voor dankbaar te wees en dat daar ander is wat minder het.
Dít kan eindelik daartoe lei dat mense wel ’n verskil begin maak.
Claassen sê hulle het al begin dink aan wat hulle kan doen om armes te help en met ’n taakgroep oor armoede in die NG Kerk daaroor geskakel.
Dit sal te duur wees om sonkrag-geisers vir mense in te sit, maar hulle kan dalk mense help wat glad nie water by hul huise het nie. Hulle ondersoek nou die moontlikheid om watertenks na arm gebiede te neem.
Hulle het al ’n spaarrekening geopen waar hulle geld vir die projek kan inbetaal.
Nie almal op die Facebook-groep gaan noodwendig deelneem aan die projek nie. Baie mense is dalk uit nuuskierigheid daar.
Hulle hoop egter dat meer en meer mense ook soos hulle sal begin koud stort – al is dit net ’n paar maande lank.
Botha sê hy voel aan dat jongmense nie net oor godsdiens wil praat nie, hulle wil iets doen.
Claassen sê hulle is die generasie wat ’n verskil wil maak.
En terwyl hul projek nog vorm aanneem, spot die studente dat hulle al krag spaar, en water ook – want as jy koud stort, stort jy heelwat vinniger.
- Beeld