Malema wil deskundiges vra om lied te verdedig
2010-04-07 22:14
- Artikelopsies
- Deel
- Kry Beeld op
Mnr. Julius Malema wil deskundige getuies gebruik om die lied waarin die woorde “skiet die Boer” voorkom, in die hof te verdedig.
Hy het in hofstukke wat by die gelykheidshof in Johannesburg ingedien is, gesê die woord “boer” verwys nie na die “Afrikaner-mense” nie, maar na ’n “verdrukker”.
Malema, omstrede ANC-jeugligaleier, se hofstukke in reaksie op AfriForum se haatspraak-klag teen hom in dié hof behels drie bladsye.
Daarin sê Malema hy het mnr. J.M. Minnie van Lourens De Lange & Minnie-prokureurs in Southdale, Johannesburg, as sy regsverteenwoordiger in dié geding aangestel.
AfriForum het die klag oor die sing van die lied verlede maand by die gelykheidshof ingedien.
Luidens Malema se hofstukke behoort die hooggeregshof in Johannesburg oor die klag te bereg weens verskeie redes:
Die klag “hou verband met ’n saak van nasionale belang”;
Die kern van die klag was volgens hom reeds die onderwerp in ’n ander konteks in dié hooggeregshof;
Die onderwerp van die klag behels kwessies wat ’n invloed op politieke, geskiedkundige en kulturele belange het; en
Die belangstelling in dié dispuut sal waarskynlik ander partye na die hofsaak lok in die vorm van amici curiae (vriende van die hof).
Malema ontken dat hy haatspraak geuiter het of dat hy onbillik op die waardigheid van enige ander persoon wou inbreuk maak.
Hy sê die “beweerde beledigende deel van die lied” moet in dié konteks gesien word: Die lied is deel van die struggle-geskiedenis van die ANC en deel van die vrymakingsgeskiedenis van die land.
Die verwysing na “boer” is “goed verskans en universeel aanvaar in ons land”.
Dié woord is nie ’n verwysing na Afrikaners nie, maar ’n woord “wat ’n verdrukker aandui”.
Malema sê hy gaan sy verweer versterk deur te verwys na deskundige getuies wie se hofstukke binne ’n redelike tyd ingedien sal word.
’n Rigtinggewende verhoor word op 3 Mei in die gelykheidshof gehou om te bepaal hoe die regsproses tussen AfriForum en Malema sal ontvou.
Die Pretoriase hooggeregshof het verlede Donderdag ’n tussentydse interdik verleen het wat Malema verbied om “dubula ibhunu” (“skiet die Boer”) te sing.