Man skiet rower op sy hoewe by Pta dood
2010-02-09 00:55
- Artikelopsies
- Deel
- Kry Beeld op
Die eienaar van ’n hoewe in Leeufontein, noordoos van Pretoria, het eergisteraand ’n rower doodgeskiet toe dié ’n vuurwapen op hom gerig het.
Kapt. Jan Sepato, polisiewoordvoerder, het gesê die man (50) het omstreeks 22:00 by sy huis aangekom. Hy het sy voertuig buite by sy hek geparkeer en is by die huis in.
“Die man het geëet, waarna hy uitgegaan het om sy motor in die motorhuis te gaan parkeer. Op pad na sy voertuig het ’n man hom genader en ’n vuurwapen op hom gerig,” het Sepato gesê.
Volgens Sepato het die eienaar gelukkig ook sy eie vuurwapen by hom gehad. “Hy het dit vinnig uitgepluk en op die vermeende rower geskiet.
“Die vermeende rower was in die 40 en is op die toneel dood. Die polisie het ook ’n 9?mm-Norinco-pistool en patrone aan die oorledene gekry,” het Sepato gesê.
Mnr. Deon Grobler, voorsitter van die Gebiedbeskermingsaksie (GBA) in Leeufontein, het die voorval met ’n cowby-prent vergelyk. “Dit was soos in ’n ou Western – óf die rower óf die ander ou.”
Hy het voornemende rowers en inbrekers gewaarsku om weg te bly van Leeufontein. “As julle in Leeufontein kom, gaan julle uitgehaal word.
“Dit is die boodskap wat ons uitstuur. Ons is op ons hoede en ons doen gereeld patrolliediens.”
Grobler het gesê verlede Saterdag het inbrekers ook by die hoewe probeer inkom, maar het hulle gevlug toe die buurtwag hulle probeer aankeer het.
Sepato het gesê die verdagte was gekleed in ’n blou sweetpakbaadjie, rooi sweetpakbroek en swart-en-wit tekkies.
Die polisie is besig met ’n geregtelike ondersoek na sy dood.
- Beeld