Man sterf in vrou se arms ná hy geskiet is in oord
2011-09-30 23:05
- Artikelopsies
- Deel
- Kry Beeld op
’n Man is by die viswaters van die Hartbeespoortdam langs sy vriend geskiet terwyl sy vrou in die motor geslaap het.
Hy is kort daarna dood.
Ses mans het op mnre. Jaco de Jager en sy vriend Hennie Jones in die De Rust-oord afgestorm en De Jager in sy kampstoel geskiet, het die polisie gesê.
Kapt. Tselane Nkala, woordvoerder van die polisie in Noordwes, het gesê toe die skoot klap, het Jones uit sy stoel gespring en in die water gespring om van die booswigte weg te kom.
Daarna het die aanvallers na die voertuig gegaan waar De Jager se vrou, Magdaleen, geslaap het.
“Die mans het die venster van die voertuig probeer uitslaan en toe het De Jager se vrou die deur oopgemaak,” het Nkala gesê.
Die mans het drie selfone, ’n skootrekenaar, haar trouring en handsak, alles saam sowat R7 000 werd, gebuit en gevlug.
Die aanvallers het volgens Nkala in twee groepe verdeel wat in verskillende rigtings gevlug het.
De Jager is glo in sy vrou se arms op die toneel dood.
Nóg me. De Jager nóg Jones is in die voorval beseer.
Die voorval was Dinsdag. Die polisie het niemand nog in hegtenis geneem nie.
Die drie het in ’n afgesonderde deel van die oord gekampeer, het mnr. Braam Oosthuizen, bestuurder van De Rust, gesê.
Hy het gesê dit was die eerste moord in dié oord, maar dat daar al vantevore verskeie klagtes oor diefstal was.
“Ons moet die heining byna daagliks regmaak waar diewe en stropers dit knip om toegang te kry.
“Ons werk aan die veiligheid, maar dis hengelaars se verantwoordelikheid om ook na hul eie veiligheid om te sien,” het hy gesê.