Man val hom dood van roltrap
2009-11-18 11:43
- Artikelopsies
- Deel
- Kry Beeld op
’n Jong man van Pretoria het sowat 15 meter na sy dood geval toe hy van ’n roltrap-reling by die Park View-winkelsentrum in Moreleta Park probeer afgly het.
Mnr. Maketa Moloantoa (21) van Sherenestraat in Garsfontein, Pretoria, het Maandagaand omstreeks 23:54 erge kop- en nekbeserings opgedoen toe hy met sy kop eerste op die grond geval het.
Sers. Lynnette Erasmus, polisiewoordvoerder, het gesê kort voor dié voorval het Moloantoa en ’n vriend, mnr. Kyle Vivier (21), uit die Fashion TV-restaurant gekom.
“Terwyl die vriend op die roltrap geklim het, het die oorledene glo op die trap se reling gespring en met sy boude afgegly.
“Hy het seker so 1,2 meter af gegly toe hy sy balans verloor het en agteroor met sy kop eerste na onder begin val het,” het Erasmus gesê.
Volgens haar is Moloantoa na die Pretoria Oos-hospitaal geneem waar hy Dinsdag in die vroeë oggendure aan sy beserings beswyk het.
Mnr. Eric Olsson, bestuurder by die winkelsentrum, het gesê hulle ondersoek die voorval.
Die polisie is ook besig met ’n geregtelike doodsondersoek, het Erasmus gesê.