McBride sê nou iemand wou hom daai aand doodmaak

Mnr. Robert McBride, voormalige Ekurhuleni-metropolisiehoof, beweer in ’n verklaring wat hy eergister ingedien het daar was ’n aanslag op sy lewe die dag in 2006 toe hy volgens die staat dronk bestuur het.

“Ons het self eers gisteroggend oor die radio van die aanslag op McBride se lewe gehoor,” het supt. Masu Zondi, woordvoerder van die polisie se eenheid vir georganiseerde misdaad, gister by navraag gesê.

“Ek kan nou egter bevestig dat ’n 21?bladsye-verklaring eergister by die Brackendowns-polisie in Alberton ingedien is wat ons uiteraard sal ondersoek.”

McBride staan in die Pretoriase landdroshof tereg op aanklagte van dronkbestuur en dwarsboming van die gereg. Dit spruit uit ’n ongeluk in Desember 2006 toe sy ampsmotor naby Centurion gerol het op pad terug van ’n werkpartytjie naby Hartbeespoortdam. Daar word beweer hy was ten tyde van die ongeluk onder die invloed van drank, maar hy ontken dit.

Gisteroggend het Eye Witness News berig daar is kort voor die ongeluk glo twee keer met McBride se motor se remme gepeuter. Hy het die remskoene twee keer in die bestek van ’n paar weke en ’n afstand van sowat 2?000?km laat vervang.

Daar word ook beweer ’n geel Mazda het die aand van die ongeluk baie vinnig verby McBride se motor gejaag, wat glo veroorsaak dat McBride uitgeswaai en sy motor gerol het.

Een van drie brande wat onlangs by die Pretoriase landdroshof uitgebreek het was in die hofsaal waar McBride verhoor word. Die polisie ondersoek brandstigting.

Meer as ’n jaar gelede is lêers waarvan party met McBride te doen het tydens ’n inbraak by die hooggeregshof in Johannesburg gesteel.

Dr. Joseph Moratioa van Ga-Rankuwa staan ook in die Pretoriase streekhof tereg op aanklagte van bedrog en regsverydeling. Die staat beweer hy het ná die ongeluk vir McBride ’n vals mediese sertifikaat uitgereik waarvolgens hy ten tyde van die ongeluk geen alkohol in sy bloed gehad het nie, maar aan lae suiker gely het.

Daar is vroeër vandeesmaand getuig die mediese sertifikaat is meer as ’n maand ná die ongeluk uitgereik.

McBride het nie gistermiddag op navrae gereageer nie.

- Beeld