Meer as staat se syfers hou dalk tuis skool

Die syfers van ouers wat by provinsiale onderwysdepartemente aansoek doen om kinders tuis te onderrig, het die laaste jare gefluktueer en weerspieël waarskynlik nie die ware toedrag van sake nie.

Uit navrae aan die onderwysdepartemente in Gauteng, Noordwes, Mpumalanga en Limpopo varieer die syfers van jaar tot jaar.

Mnr. Leendert van Oostrum, bestuurder van die Pestalozzi Trust, ’n regsfonds vir tuisonderwys, het gesê die syfers moet bevraagteken word aangesien daar ’n deurlopende toename in tuisleerlinge is.

“Ons sien dit veral in die getal leerlinge wat vir die matriekeksamen inskryf. Dit styg jaarliks met omtrent 20%”
Die trust het reeds tussen 5 000 en 6 000 lede.

Volgens Van Oostrum is baie tuisleerlinge waarskynlik nie by departemente geregistreer nie omdat van die voorwaardes wat departemente stel, onafdwingbaar is.

Volgens hom word daar dikwels van tuisleerlinge en hul ouers verwag om “deur hoepels te spring”, wat strydig is met kinders se belange en behoeftes.

’n Voorbeeld is amptenare wat tuisleerlinge se huise wil inspekteer. Dit is onwettig, het hy gesê. Die Gautengse onderwysdepartement het gesê daar is tans 972 kinders in die provinsie wat tuisonderrig kry. Tussen Januarie en Augustus het die departement 101 aansoeke gehad. Verlede jaar was daar 134 aansoeke.

Van die redes waarom ouers tuisonderrig verkies, is dat hulle sendingwerk doen, van een provinsie na ’n ander verhuis, godsdienstige oortuigings en waardes, dat ouers hul reg uitoefen om tuisonderrig bo openbare onderwys te kies, dat leerlinge leergestremdhede het, en dat skole nie die bepaalde vakkeuse aanbied wat leerlinge wil volg nie.

Nog redes is dat leerlinge emosionele probleme het weens dood, ongelukke, molestering of egskeiding, onbekostigbare private onderrig, en professionele deelname aan sport.

Volgens Limpopo se onderwysdepartement was daar vanjaar net een aansoek vir tuisonderrig en net een bied dit tans aan.

In Noordwes is daar vanjaar agt leerlinge in tuisonderrig, aldus die departement. In 2007 was daar 13 leerlinge.

Die getal leerlinge in tuisonderrig in Mpumalanga het van 42 verlede jaar tot 62 vanjaar toegeneem. Leerlinge moet minstens drie uur per dag 200 dae per jaar onderrig kry en ’n ouer moet die hele onderrigtyd teenwoordig wees.