Meer in jou sak met nuwe siekefonds-plan
2012-02-22 14:19
- Artikelopsies
- Deel
- Kry Beeld op
Kaapstad. — Suid-Afrikaners kry vanjaar belastingverligting van
R9,6 miljard danksy die aanpassing van belastingkerwe om vir inflasie
voorsiening te maak, maar aan die ander kant is kapitaalwinsbelasting, wat
betaalbaar is as bates soos eiendom of aandele verkoop word, skerp
verhoog.
Mnr. Pravin Gordhan, minister van finansies, het in sy nasionale
begrotingsrede ook ’n nuwe manier aangekondig waarop mense belastingverligting
vir hul bydraes tot siekefondse kry.
Dit behels ’n belastingkrediet van R230 per maand vir die eerste
twee lede van ’n siekefonds, en daarna R154 elk vir bykomende lede.
’n Belastingbetaler wat R16 040 per maand verdien en maandeliks
R1203 tot ’n pensioenfonds en R2263 vir homself en drie afhanklikes tot ’n
siekefonds bydra, sal onder die bestaande stelsel R11 202 in sy sak hê ná
aftrekkings vir sy pensioen- en siekefondsbydraes.
Met die voorgestelde belastingkrediet sal hy nou R11 404 in sy sak
hê, dus R202 meer as onder die bestaande stelsel.
Danksy die belastingverligting wat Gordhan aangekondig het, sal die
persoon ’n bykomende R115 terugkry.
Die nuwe stelsel tree op 1 Maart in werking.
Die insluitingskoers waarteen kapitaalwinsbelasting op individue en
spesiale trusts gehef word, word op 1 Maart van 25% tot 33,3% verhoog. Vir
maatskappye en ander trusts is die koers van 50% tot 66,6% verhoog.
Gordhan het verdere belastingverligting vir kleinsake-ondernemings
aangekondig.
Die belastingdrempel vir kleinsake is tot R63 556 verhoog en die
10%-koers waarteen kleinsake bo dié drempel belasting moet betaal is tot 7%
verlaag.
Die 7%-belasting sal boonop van toepassing wees op ondernemings wat
tot soveel as R350 000 se belasbare inkomste per jaar ontvang.
Brandstofbelasting is skerp met 28c per liter verhoog.
Dit tree op 4 April in werking en sluit ’n verhoging van 8c in die
Padongelukfondsheffing in. Die aksyns op bier is met 10% tot R1,01 vir ’n 340
ml-blikkie verhoog en die aksyns vir spiritualieë styg met 20% tot R36 vir ’n
750 ml-bottel.