Misdaad daal skerp in Jo’burg en Pretoria

Misdaad in Pretoria en Johannesburg het gedurende WB 2010 aansienlik afgeneem – in sommige omgewings tot met 70%.

Mnr. Clive Humphrey, besturende direkteur van die veiligheidsmaatskappy ADT in Pretoria, het gister gesê veral geweldsmisdaad het oor die hele Pretoria afgeneem.

“Inbrake by huise in die suide van Pretoria en Centurion het aansienlik afgeneem.”

In Johannesburg-Wes het misdaadvoorvalle met 70% afgeneem en in Johannesburg-Oos met 60%, het mnr. Roy Rawlins, ADT-hoof in dié stad, gister gesê.

Hy skryf die daling toe aan die “toename in sigbare polisiëring wat gepaard gaan met strategiese ontplooiing van hulpbronne vir die WB”.

Volgens kol. Vish Naidoo van die WB Nasionale Gesamentlike Operasiesentrum is sowat 55 000 bykomende permanente polisiebeamptes aangestel in die vyf jaar voor WB 2010. “Die reservistemag is ook versterk.”

Naidoo het bevestig misdaad het wél gedaal tydens die toernooi, maar kan nog nie die polisie se WB-misdaadstatistieke beskikbaar stel nie.

Naidoo het vrese dat misdaadvlakke ná die toernooi weer sal styg, probeer besweer.

Dr. Johan Burger, senior navorser van die Instituut vir Sekerheidstudie (ISS), het onlangs gesê het hy kan nie sien hoe die polisie dié hoë sigbaarheid ná WB 2010 sal kan volhou nie.

Volgens hom is alle lede se verlof tydens die toernooi gekanselleer, wat die polisie in dié tydperk in staat stel om alle hulpbronne te benut.

“Daar is nie rede tot kommer nie. Mense moet egter verstaan dat daaglikse polisiëring op misdaadpatroonontledings gegrond word. Polisiekantore gebruik dié ontledings om teikenareas te bepaal en beamptes daarheen te ontplooi,” het Naidoo gesê.

“Tydens ’n massiewe gebeurtenis soos WB 2010 het die polisie inligting oor presies watter areas kwesbaar gaan wees en ontplooi magte daarvolgens.”