Die vloot se voormalige eerste vroue-admiraal, wat skuldig bevind
is aan aanranding en bedrog, is deesdae die hoof van die Suid-Afrikaanse
Nasionale Weermag (SANW) se projek om jong burgers in morele waardes en etiek op te lei.
Skout.adm. Khanyisile Litchfield-Tshabalala het die SANW in 2008
onder ’n wolk verlaat en toe weer vir omstredenheid gesorg toe sy in Augustus 2010 in die weermag se reserwemag (RM)
aangestel is.
Me. Lindiwe Sisulu, minister van verdediging, het in antwoord op ’n
parlementêre vraag van mnr. Pieter Groenewald, VF+-LP en -woordvoerder oor
verdediging, gesê Litchfield-
Tshabalala is deesdae koördineerder van die SANW se
nasionale jeugdienstaakspan wat al 1?500 jeugdiges teen ’n koste van
R35,2?miljoen opgelei het.
Tydens dié opleiding word jeugdiges van onder meer
lewensvaardighede en dissipline geleer, asook om ’n goeie rolmodel te wees en
nie misdaad te pleeg nie.
Leierskapsontwikkeling, fiksheid, patriotisme en drilvaardighede is
ook deel van die kurrikulum.
Litchfield-Tshabalala is skuldig bevind aan bedrog nadat sy R15?000 geëis het vir ’n weermagrekenaar wat nie
werklik gesteel is nie en ’n ondergeskikte aangerand het.
Sy het ’n opgeskorte vonnis van ’n
jaar tronkstraf en ontslag uit die weermag ontvang.
Sy het ’n R6?000-boete betaal en moes
ook die R15?000 wat sy geëis het aan die
weermag terugbetaal.
“Dit is duidelik dat Litchfield-Tshabalala totaal onbevoeg is om in
diens van die SANW te wees en sy moet dadelik
afgedank word,” het Groenewald gesê.
Hy het Litchfield-Tshabalala, wat sedert haar skuldigbevinding ’n
militêre misdaadgeskiedenis het, as ’n “verleentheid en skande” vir die weermag
en haar kollegas beskryf.
“Dit skaad ook die beeld van die hele weermag en Suid-Afrika in die
buiteland dat ons weermag misdadigers as senior offisiere het.”
Mnr. Ndivhuwo Mabaya, Sisulu se woordvoerder, het gesê hy kan nie
kommentaar lewer nie aangesien die minister nie vir die aanstelling van soldate verantwoordelik is nie.
Mnr. Siphiwe Dlamini, departementele woordvoerder, het gesê die
departement is bewus van Litchfield-Tshabalala se geskiedenis, maar haar misdaadgeskiedenis is ou nuus en haar
aanstelling nie permanent nie. Sy is egter al
langer as drie jaar in die pos.
Volgens die departement van verdediging se regulasies mag iemand
met ’n vorige strafregtelike oortreding nie as offisier in die RM aangestel word
nie.
Mnr. James Lorimer, waarnemende DA-woordvoerder oor verdediging,
het gesê dit is ironies dat Litchfield-Tshabalala jeugdiges leer van etiek en om goeie
rolmodelle te wees.
“As enigiemand ’n slegte rolmodel is, is dit
Litchfield-Tshabalala.”