‘Moordsaak is wit komplot’
2011-06-30 00:46
“Ek het besluit om vandag (gister) nie in die hof te huil nie. Ek wou nie weer opspraak wek nie,” het mev. Elana van Breda gister gesê.
Sy is die vorige dag deur adv. Paul Shapiro, regsverteenwoordiger van haar man se vermeende moordenaars, beskuldig dat sy in die hof sit en huil om “die hof te beïnvloed”.
Sy moes gister “trane wegsluk” om nie te huil nie. Haar man, mnr. Dawie Maree (27), is op 23 Mei 2008 in die gesin se huis in Meyerspark, Pretoria, vermoor.
“Hoe kan ’n mens nie huil nie as jy moet luister hoe seer die man, wat jy met jou hart liefgehad het, gehad het? As ek nie gehuil het nie, was ek ’n monster.”
Die trane het eergister oor Van Breda se wange geloop terwyl sy geluister het na ’n lykskouer se getuienis dat haar oorlede man vier keer geskiet is.
Haar trane het ’n hewige woordewisseling tussen Shapiro en regter Tshifiwa Maumela ontketen.
Shapiro het gekla dat haar trane “hoogs skadelik” vir die saak is.
Van Breda het gister net nou en dan haar kop geskud nadat Shapiro onder meer gesê het haar oorlede man is ’n rassis en dat ’n sameswering van wit Afrikaanssprekende mense daartoe gelei het dat mnre.
Lawyer Marabe Talane en Rodney Katang Masemola van Maree se moord aangekla is.
Shapiro het gesê Talane en Masemola beweer hulle word valslik by Maree se moord betrek.
“Volgens beskuldigde een (Talane) is almal wat by dié saak betrokke is, wit Afrikaanssprekende mense. Dit is wit Afrikaanssprekende polisiebeamptes wat gesimpatiseer het met ’n wit Afrikaanssprekende vrou wie se wit Afrikaanssprekende man doodgemaak is,” het Shapiro gesê.
Shapiro het aan ao. Gawie Jansen van Rensburg, wat getuig het oor Talane se vingerafdruk wat hy die dag van Maree se dood in sy huis gekry het, gesê die polisie het Talane se vingerafdruk “geplant”.
Volgens Shapiro het Talane gesê ’n “wit polisieman” het hom in die huis ingeneem en hom gedwing om te leun op die vensterbank, waar Jansen van Rensburg die vingerafdruk gekry het.
Hy het gesê Masemola beweer ook dat die polisie hom valslik by die moord betrek het.
“Die hele saak teen die beskuldigdes is gerekonstrueer. Ons sê Dawie het ’n reputasie gehad dat hy swart mense aanrand. Hy het dit nie net een keer gedoen nie,” het Shapiro gesê.
Van Breda, ma van drie kleuters, is ná Maree se dood weer getroud, vandaar haar nuwe van.
Adv. Paul Shapiro gister buite die hooggeregshof in Pretoria.
Foto: Liza van Deventer