NGK-lede ontstig oor ‘lasterlike’ geklets

Talle kerkmense het hul messe in vir ’n joernalis van Kerkbode omdat hulle meen hy bedryf ’n godslasterlike en vloekende webwerf.

Die kop van mnr. Jean Oosthuizen, nuusredakteur van Kerkbode, word geëis in briewe wat tans in die kerk rondgestuur word.

Oosthuizen bedryf Kletskerk (www.kletskerk.co.za), waar daar ’n oop gesprek oor godsdiens gevoer word. Hy sê die deelnemers wissel van fundamentaliste tot ateïste.

Bekommerde kerklui verkwalik Oosthuizen nou vir die kru godslastering wat sommige deelnemers kwytraak.

Oosthuizen sê daar is ’n klomp goed wat op die webwerf verskyn waarmee hy ook nie saamstem nie, maar dit is ’n spieëlbeeld van “goed wat daarbuite gesê word”.

Terwyl sommige mense nou kla, is daar ook kerklui wat meen die NG Kerk moet ook dié stemme hoor.

Oosthuizen sê daar is ’n klein groepie radikale mense wat al lank oor Kletskerk kla.

Dit lyk of die klagtes nou meer momentum begin kry.

Dr. Kobus Gerber, algemene sekretaris van die NG Kerk, sê daar het die laaste tyd ’n stroom e-posse by hom aangekom, onder meer van die moderature van twee streeksinodes.

Die moderatuur van die algemene sinode sal dit later vandeesmaand op ’n vergadering bespreek, maar daar sal intussen ook ’n gesprek met ds. Anton Pienaar, redakteur van Kerkbode, gevoer word.

Pienaar het gister gesê hy het besware oor Kletskerk gekry en hy sal dit aanstaande week met Oosthuizen bespreek wanneer hulle weer op kantoor is. Hy beskou Oosthuizen as ’n goeie en lojale joernalis en is jammer as daar spanning tussen ’n personeellid van Kerkbode en die breër kerk ontstaan.

Prof. Piet Strauss, moderator van die algemene sinode, het gesê Kletskerk is Oosthuizen se eie projek en die NG Kerk het homself losgemaak daarvan.

Daar is egter steeds ’n skakel na Kletskerk op Kerkbode se webwerf.

- Beeld