NW-geldverslae skok

Mahikeng. – “As jy aan staatseiendom raak, is daar nie onderhandelinge nie, jy sal tronk toe gaan.”

Dit was die waarskuwing wat me. Thandi Modise, Noordwes se premier, gister aan korruptes gerig het by die opening van die provinsiale wetgewer.

Al 24 Noordwes se munisipaliteite word vir korrupsie en wanbestuur ondersoek. Van die munisipaliteite was al onder administrasie.

Die prestigeryke opening gister het sowat R4 miljoen gekos en 3 000 mense is genooi, het mnr. Chris Hattingh, DA-leier in Noordwes en lid van die wetgewer, gesê.

“Dis ’n skande, die Wes-Kaapse opening het R203 000 gekos.”

Modise het gesê die 2010-’11-boekjaarverslae is “skokkend”.

“Net nege munisipaliteite het finansiële verslae by die ouditeur-generaal ingedien. Dit kan nie geduld word nie.”

Die premier het gesê wanbestuur, onreëlmatige besteding, bedrog en korrupsie moet ernstig aandag kry.

“Vaardige mense moet aangestel word.”

Die provinsie borg daarom studente om in rekeningkunde en finansiële bestuursrigtings te studeer. Hulle sal ná hul studie by munisipaliteite in die provinsie geplaas word.

Daar is ook provinsiale beurshouers. Die fokus val op skaars vaardighede soos ingenieurswese, gesondheidsberoepe en stadsbeplanners.

“Ons moet aanhou streef na ’n korrupsievrye administrasie. Ons teenkorrupsie-eenheid veg daarom hard om goeie bestuur.”

Die provinsiale regering het onder meer ’n fonds gevestig vir noodsaaklike dienste soos water, watersuiwering en sanitasie.

Modise het gesê Noordwes behoort Suid-Afrika se landbousentrum te wees.

’n Opleidingsentrum vir ontluikende boere sal binnekort in die provinsie bekend gestel word.

Volgens die premier spog Noordwes nou met een van die beste gesondheidsdepartemente in die land en het die voorkoms van MIV-infeksies met 0,4% afgeneem.

“Ons matriekresultate was die derde beste ... met ’n slaagsyfer van 77,8%”.

Modise het gesê toerisme is uiters belangrik vir die provinsie en dat meer groei nodig is.

Hattingh meen Modise se openingsrede was “teleurstellend, vaag en sonder ’n behoorlike tydraamwerk”.

“Sy moet besluit of sy adjunk-sekretaris-generaal van die ANC of premier wil wees, sy is uit voeling met wat op grondvlak gebeur.

Dis verontrustend dat sy g’n plan ter tafel gelê het om die feit dat Noordwes een van die slegste provinsies in die land is om te keer nie. ”