Néé, sê Woolworths

’n Onafhanklike webwerf wat verbruikerspryse dophou is toegang geweier tot ’n na­sio­nale kettinggroep en twee van hul navorsers is uit ’n winkel gejaag.

Me. Viccy Baker van Red Gekko Design and Branding Solutions in Johannesburg bedryf die webwerf Retail Price Watch.

Dié webwerf teken die pryse van sowat 10 000 produkte aan.

Volgens Baker is die idee dat verbruikers aanlyn pryse by hul plaaslike winkels kan vergelyk en daarom doen haar navorsers prysopnames by elke spesifieke winkel.

Sy het ’n bloutjie geloop toe sy Woolworths om toestemming gevra het om inligting in hul winkels te versamel.

“Voordat ek met die webwerf begin het, het ek ’n regsmening gekry en daar is geen wettige rede waarom ek nie die pryse kan nagaan as hulle dit in elk geval bekend maak (op hul eie webwerf) nie.

“Ek het steeds gevoel dit sal beleef wees om toestemming te vra en ek sal eerder hul samewerking wil hê.”

Baker het die besturende direkteur in April verlede jaar gekontak en het in Augustus uiteindelik daarin geslaag om ’n afspraak met Woolworths se bestuur te reël.

Hulle het haar versoek afgekeur.

Sy het voortgegaan om haar personeel na plaaslike takke van Woolworths te stuur omdat “hulle my geen wettige rede gegee het waarom ek dit nie kan doen nie”.

Op 13 Januarie is twee navorsers na die Woolworths by die Fourways-winkelsentrum, waar hulle eers die bestuurder se toestemming gevra het om die pryse te mag nagaan.

Hy het aanvanklik ingestem, maar gesê hy sal by die hoofkantoor moet seker maak.

“Hy was toe baie kortaf met my mense en het gesê hulle moet die winkel onmiddellik verlaat,” het Baker gesê.

Me. Zyda Rylands, Woolworths se besturende direkteur van voedsel, het aan Beeld gesê hulle ontvang dikwels soortgelyke versoeke en dat hulle elke versoek na verdienste beoordeel.

“Hoewel ons kritieke prysnavorsingsprojekte tegemoet sal kom, soos dié wat deur statutêre liggame uitgevoer word, verkies ons om ons winkels toe te laat om op handel te fokus.

“Ons is ingeteken op ’n diens wat pryse in die kleinhandelbedryf vergelyk en Red Gekko kan ook daarop inteken.”

Rylands het bygevoeg Woolworths se produkte is dikwels nie regstreeks vergelykbaar met dié van ander kettingwinkels nie.

“Ons is byvoorbeeld die enigste groep wat net plaaseiers verkoop. Dit is effens duurder. Dit is dus nie moontlik om Woolworths se eiers met die res van die mark s’n te vergelyk nie.”

Baker het gesê Woolworths is die enigste groep wat haar versoek summier afgekeur het.