Nestlé: AfriForum begin veldtog oor melkaankope
2009-09-30 23:56
- Artikelopsies
- Deel
- Kry Beeld op
Die burgerregte-inisiatief AfriForum het ’n veldtog teen Nestlé begin omdat dié onderneming melk koop van die plaas van pres. Robert Mugabe se vrou.
As Nestlé nie binne ’n week ophou daarmee nie, wil AfriForum hê dat mense ’n wêreldwye boikot teen Nestlé-produkte begin.
Dit kom nadat Suid-Afrikaanse teoloë gister gevra het dat druk op Nestlé geplaas word en die moontlikheid van ’n boikot genoem het.
Op die webwerf www.nestlebloodmilk.com vra AfriForum dat mense e-posse aan Nestlé se kantore in Switserland, Suid-Afrika en Zimbabwe stuur om teen die aankoop van “bloedmelk” van mev. Grace Mugabe se plaas beswaar te maak.
Mnr. Kallie Kriel, uitvoerende hoof van AfriForum, het gesê: “Nestlé se aankoop van sowat 1?miljoen liter melk van die plaas wat mev. Grace Mugabe onder verdagte omstandighede ‘bekom’ het, is ’n miskenning van die basiese menseregte van elke Zimbabwiër wie se bloed gevloei het en steeds vloei aan die hand van Mugabe.”
Nestlé het vroeër in ’n verklaring gesê hy beplan nie om aan Zimbabwe te onttrek nie.
Dit sou tot verdere kostekorte en honderde werkverliese lei.
Die maatskappy het by die plaas van Mugabe se vrou begin melk koop nadat 8 van sy 16 verskaffers teen einde verlede jaar hul deure gesluit het.
Die melk wat hulle by mev. Mugabe se Gushungo-melkplaas koop, is tussen 10% en 15% van hul plaaslike voorraad.
- Beeld