Niks fout met ou landsvlag

Durban. – Die ou Suid-Afrikaanse landsvlag is nooit verbied nie en die vertoon daarvan word deur mense se reg tot spraakvryheid beskerm.

So het grondwetkenners gister gesê nadat komm. Bheki Cele, nasionale polisiehoof, die vorige dag opdrag gegee het dat ’n klein landsvlaggie uit die vorige bedeling uit die kantoor van ’n junior bestuurder van Metrorail in Durban verwyder word.

Cele het dié opdrag gegee nadat mnr. Nathi Mthethwa, minister van polisie, dit toevallig in die vrou se kantoor raakgesien het.

Sowel prof. Marinus Wiechers, wat die Grondwet help opstel het, as prof. Pierre de Vos, grondwetkenner van die Universiteit van Kaapstad, het gesê die reg tot spraakvryheid beteken dat mense steeds die ou landsvlag kan vertoon.

Veral in 1996 het die vertoon van ou landsvlae by rugbywedstryde ’n polemiek veroorsaak en het die Suid-Afrikaanse rugby-owerhede hulle sterk daarteen uitgespreek, maar dis nooit in stadions verbied nie.

Die ou landsvlag is nooit deur enige wet verbied nie en selfs al sou iemand dit wou doen, sal dit ongrondwetlik wees, het De Vos en Wiechers gesê.

“Baie mense sou sê dit (die ou landsvlag) is onooglik. Maar vryheid van spraak beteken dat ons ook standpunte moet aanvaar wat vir ons veragtelik is,” het De Vos gesê.

Volgens Wiechers word slegs haatspraak en die aantas van iemand anders se eer nie deur spraakvryheid beskerm nie. Hy reken dit was ’n growwe en onsensitiewe magsvergryp aan Cele se kant om opdrag te gee dat die vlaggie verwyder moet word sonder om die kwessie eens met die vrou te bespreek.

De Vos het gesê dit is moontlik dat individuele instellings reëls kan maak oor wat hulle in die werkplek toelaat, solank dit duidelik uitgestippel word. Dit sou byvoorbeeld verdedigbaar wees as iemand wat met die publiek werk of die staat op een of ander manier verteenwoordig, verbied word om ’n ou landsvlag in sy kantoor ten toon te stel.

“Maar in jou persoonlike hoedanigheid is jy vry om die ou landsvlag voor jou huis te hys,” het hy gesê.

Me. Thandi Mkhize, Metrorail-woordvoerder, het gesê die instelling het ’n beleid dat geen partypolitieke vlae of T-hemde of landsvlae wat nie meer in gebruik is nie in hulle kantore ten toon gestel mag word nie.

- Beeld