Nóg ’n aanval op toeriste in Hermanus-reservaat

Hermanus. – Twee Kanadese toeriste is gisteroggend in die Fernkloof-natuurreservaat hier aangeval en ernstig beseer. Dit is die vierde aanval in dié reservaat die afgelope twee maande.

Die twee toeriste, wie se name nie bekend gemaak is nie, is deur ’n onbekende aantal aanvallers met messe gesteek en glo ook met klippe bestook.

Die aanval het omstreeks 07:15 gebeur, maar die erg beseerde paartjie is eers omstreeks 10:00 op die staproete deur ’n ander groep stappers gevind.

Paramedici is ontbied en het die paartjie op die toneel gestabiliseer voordat hulle met ’n reddingshelikopter weggevat is.

Die helikopter was in die omgewing van die natuurreservaat om te help met die verwydering van die lyk van ’n onbekende man wat eergister deur stappers op ’n rotslysie in die berg gevind is.

Na verneem word, is die paartjie na die Medi-Clinic in Hermanus gebring. ’n Woordvoerder van dié hospitaal wou egter nie bevestig of hulle daar is nie.

In November is ’n Italiaanse paartjie en ’n Duitse paartjie in afsonderlike voorvalle in dié reservaat deur twee mans aangeval en met messe gedreig.

’n Groep van agt bejaarde stappers van Somerset-Wes is einde November ook in die reservaat aangeval.

Ná die aanval op die bejaardes het die Overstrand-munisipaliteit aangekondig dat sommige van die 100 wetstoepassers wat vir die feestyd aangestel is, ook by die reservaat ontplooi sal word.

- Beeld