Nuwe held verrys vir SA krieket
2012-02-19 22:10
Kaapstad – Richard Levi, Suid-Afrika se nuwe krieketheld, was van kleins af te groot en sterk vir sy teenstanders op die krieketveld.
Dié 24-jarige Kapenaar het gister in Hamilton, Nieu-Seeland, met sy kolf ’n rits rekords oortref op pad na sy onoorwonne 117 teen die Kiwi’s. Hy het onder meer die vinnigste honderdtal en die meeste sesse nog in ’n Twintig20-beurt gemoker.
Sy 117 het ook Chris Gayle se rekord vir die hoogste telling geëwenaar.
Gister het hy die Proteas gehelp om die tweede Twintig20-wedstryd teen die Kiwi’s op ’n drafstap te wen.
Levi was vroeër vandeesmaand een van die spelers wat nie ’n kontrak kon kry om vanjaar in die skatryk Indiese Premierliga te speel nie. Nou word daar in Indië gewonder hoe die IPL-spanne hul huiswerk so swak kon doen dat ’n speler soos Levi deur die net geglip het.
’n Senior amptenaar by een van dié spanne het gister aan die Times of India gesê dat Levi glad nie ’n speler was wat hulle oorweeg het nie.
“Ons het ’n beperkte begroting gehad en net na sterspelers gekyk. Ons het niks van dié ou geweet nie,” het die amptenaar erken.
Levi se pa, Jonathan, het gesê sy seun se kragvertoning voel soos ’n droom.
“Jissie, ek kan dit amper nog nie glo nie. Dit was maar net sy tweede wedstryd vir Suid-Afrika en jou eerste gedagte is om net te hoop dat hy nie ’n gek van homself maak nie. Hoe volg jy so ’n vertoning op?” wou Levi sr. weet.
Die nuwe krieketheld se pa vertel dat as ’n klein kannetjie sy seun beter op die rugbyveld as op die krieketveld vertoon het. “Hy was ’n klein losskakel wat die bal met albei voete ewe goed kon skop. Hy het egter met beserings gesukkel en op hoërskool het hy hokkie gespeel in die winter.”
Mnr. Keith Richardson, skoolhoof by Wynberg Boys High waar Levi diep spore getrap het, het gesê Levi het van kleins uitgeblink.
“Omdat hy van kleins af groter en sterker as sy tydgenote was, het hy altyd teen ouer seuns gespeel. Ek dink dis een van die redes waarom hy so goed is.”
Sluit aan by Beeld se Facebook-bladsy en volg Beeld
op Twitter