Onwettig ry dán nie gestraf – landdros

Die minister van vervoer het te velde getrek teen ’n landdros wat sê ’n leerlingbestuurder wat in die hof kan bewys hy het onwettig bestuur omdat hy ná talle pogings nie ’n afspraak vir sy rybewystoets kon kry nie, sal waarskynlik skotvry daarvan afkom.

Mnr. S’bu Ndebele het gister in ’n verklaring gesê adv. Daniel Thulare, hooflanddros van die Daveyton-landdroshof naby Benoni, verdedig wetteloosheid.

“Ek sê nié ‘gaan bestuur met jou leerlingrybewys nie’,” het Thulare gister aan Beeld beklemtoon.

Thulare reken iemand wat in die hof verskyn en kan bewys dit was vir hom onmoontlik om sy rybewys te kry, sal waarskynlik onskuldig bevind word.

So iemand sal moet bewys hy het die nodige stappe gedoen, soos om afsprake te probeer maak. Hy sou moes rekord hou van wanneer hy afsprake gemaak het, hoe lank hy aangehou het elke keer wanneer hy die oproepsentrum gebel het ensovoorts, het Thulare bygevoeg.

“Geen redelike mens (landdros) sal nie verstaan nie.”

Volgens Thulare moet die staat mense die nodige hulpbronne bied om hul rybewys-toetse af te lê.

Hy het gesê ’n man wat al vier keer ’n leerlingrybewys gehad het en nie ’n afspraak kon kry nie, het hom genader. “En hy is nie die enigste ou nie.”

Prof. Marinus Wiechers, oudregsdosent aan Unisa, stem nie saam met Thulare nie. Sou die hof iemand wat met net ’n leerlingrybewys bestuur het, onskuldig bevind, neem die hof aan dat die beskuldigde die rybewystoets sou geslaag het indien hy dit afgelê het, reken Wiechers.

“Die hof kan dit nie doen nie. Hy is nie ’n rybewystoetsterrein nie.”

Volgens Wiechers kan die landdros iemand wel skuldig bevind, maar ’n gesukkel om ’n afspraak te kry as versagtende omstandighede beskou en die onwettige bestuurder nie beboet nie.

Ndebele het gesê ’n leerlingbestuurder sal in die geval van ’n botsing daarvan aangekla word dat hy nie ’n rybewys het nie en ’n siviele eis kan teen hom ingestel word.

“ ’n Ongelisensieerde bestuurder bedreig nie net sy/haar eie veiligheid nie, maar ook ander padgebruikers se veiligheid.”

Mnr. Logan Maistry, Ndebele se woordvoerder, het gesê die departement is bekommerd dat Thulare se stellings die indruk kan wek dat dit aanvaarbaar is om met net ’n leerlingrybewys te bestuur.

- Beeld