Operasies wag oor talle met verlof is

Dit lyk of die Steve Biko- Akademiese Hospitaal in Pretoria gaan sukkel om sy agterstand in beplande (elektiewe) operasies wat tydens WB 2010 ontstaan het, binnekort uit te wis.

Soveel verpleegsters neem nou glo verlof nadat hulle verbied is om dit tydens die toernooi te doen dat operasies weer uitgestel moet word.

Ingeligtes beweer chirurge is aangesê om hul teaterlyste tot minstens einde Augustus te sny.

Mnr. Willem Els (76), ’n Pretorianer, het vertel ontstoke dokters het hom en meer as 20 ander pasiënte vandeesweek huis toe gestuur.

“Ons het die hele dag daar gesit en wag. Ek moet ’n heupoperasie kry en loop al jare in pyn. Skielik het die dokters gesê hulle kan nie opereer nie.

“Hulle het gesê ons moet oor so drie tot vier weke terugkom.”

Beeld verneem die beperking van teaterlyste geld ook in die onkologie-afdeling.

Tot 50% van teaterlyste is glo sedert 11 Junie gekanselleer.

Na verneem word, is daar kankerpasiënte wat dringend geopereer moet word.

Tydens WB 2010 is alle elektiewe operasies beperk sodat die hospitaal op ’n gereedheidsgrondslag vir moontlike groot rampe kon wees.

Mnr. Mandla Sidu van die departement het gister ontken dat teaterlyste met 50% gesny is.

“Die aantal operasies word onder meer bepaal deur die beskikbaarheid van teatersusters, soos nog altyd die geval was, en dit gebeur in alle hospitale, ook op ander plekke,” was die antwoord wat Sidu van die hospitaal gekry het.