Opsigter by rusoord deur Zimbabwiër doodgeskiet

’n Opsigter (65) by vakansie-chalets op ’n Bosveldplaas in Limpopo is gister kort ná 13:00 doodgeskiet toe ’n Zimbabwiër hom en sy vrou aangeval het.

Sy vrou het teruggeskiet en die aanvaller gewond.

Mnr. Jan Potgieter is in sy rug geskiet op die plaas Johannesberg in die Villa Nora-distrik, sowat 50 km van Lephalale (Ellisras) af. Hy is in die huis dood.

Die Zimbabwiër is in sy een sy gewond toe Potgieter se vrou, Annelie, op hom geskiet het. Die blitsvinnige optrede van boere en polisie in die gebied tot die arrestasie van ’n 18-jarige man gelei.

Die Zimbabwiër is omstreeks 17:00 op die walle van die Phalala-rivier vasgetrek, het supt. Mohale Ramatseba, provinsiale polisiewoordvoerder, gesê.

Mnr. Neels Hennop, ’n boer in die gebied, het gesê die Zimbabwiër het glo vir Potgieter gewerk.

Dis onduidelik wat gebeur het toe Potgieter en sy vrou aangeval is. Daar was glo ’n struweling in die huis waartydens Potgieter geskiet is, het Ramatseba gesê.

’n Pistool en ’n geweer is in die huis gekry. Dit was teen druktyd nog nie duidelik met watter wapen Potgieter geskiet is nie.

Mnr. Japie Spanio, veiligheidsvoorsitter van TLU SA, het gesê boere is danksy radioverbinding in die gebied baie vinnig oor die aanval ingelig. Hulle het die plaas omsingel en van die paaie in die gebied afgesper.

’n Private helikopter, wat gewoonlik gebruik word om wild te vang, ’n polisiehelikopter en spoorsnyers was ook deel van die reuse-soektog.

- Beeld