Oue se vrees: ‘Net nie verkrag’
2010-10-28 21:46
‘Ek het net die hele tyd gedink: Moet my net nie verkrag nie, want dan maak ek myself dood.”
So het ’n vrou (75) van Primrose in Germiston aan die Oos-Rand gister vertel van haar vrees toe ’n inbreker haar geslaan en op haar gesit het om geld en juwele van haar te kry.
Me. Renske Cowan was verlede Dinsdag alleen tuis.
Die aanvaller het vermoedelik die agterdeur se veiligheidshek oopgebuig om in te kom.
“Ek het net so voor 13:00 gesit en TV kyk, toe ek net die beweging sien en sy arm wat my om die nek gryp. Ek het verskriklik geskrik.
“Toe ek skreeu, gryp hy die huistelefoon, slaan my deur die gesig daarmee en breek my neus.
“Hy pluk my toe van die stoel af en druk my gesig in die mat. Intussen loop die bloed van my neus en mond als in my keel en ek kry nie asem nie,” het Cowan gesê.
Die inbreker het haar deur die huis na die kamer van haar dogter, Lucia (36), gesleep en haar hande met ’n koord vasgebind.
“Ek het toe maar bedeesd en inmekaargekrimp op die stoel gesit en na die vloer gekyk terwyl my gesig en neus bloei, te bang om op te kyk en hy weer slaan as ek vir hom kyk.
“Hy hardloop toe in die huis rond en soek geld en juwele. Ek wys toe vir hom die paar juwele wat ons het, maar dié is nie goed genoeg nie. Die bietjie geld wat ek hier gehad het, het hy gevat.
Hy soek toe iets om die goed in te sit, toe wys ek vir hom ’n tas waarin hy toe die DVD-speler en my dogter se rekenaarmonitor insit en hy is daar weg,” het sy gesê.
Sy het nog ’n rukkie gewag, haar hande losgewikkel en hulp by die bure, me. Hetta Barnard, gaan soek. Hulle het die polisie en ambulans gebel.
In die hospitaal is sy “van kop tot toon” ondersoek.
Haar neus is gebreek, haar handbeentjies is gekraak en die binnekant van haar mond was heeltemal stukkend.
“Ek kon net met ’n strooitjie eet.”