Padvalk-adjunk ondersoek weens voertuie, bedrog
2011-09-20 23:00
- Artikelopsies
- Deel
- Kry Beeld op
Die polisie ondersoek dir. Ndumiso Jaca, adjunkhoof van die Tshwane-metropolisie, omdat hy die Padverkeerswet oortree het.
Buiten dié ondersoek, word Jaca deur die Onafhanklike Klagtedirektoraat en intern deur die Tshwane-metro weens beweerde bedrog ondersoek.
Die ondersoeke word gedoen nadat dit aan die lig gekom het dat die BMW Z4 waarmee Jaca ry nie op die eNaTIS-stelsel geregistreer was nie. Dié motor en die Harley-Davidson-motorfiets waarmee hy ry het dieselfde nommerplaat – BALTY GP – wat ook nie geregistreer was nie.
Afgesien daarvan dat die motorfiets nie aan Jaca behoort nie, het die BMW Z4 ook ’n blou polisielig, maar die motor is nie as amptelike polisievoertuig geregistreer nie.
Mnr. Howard Dembovsky, voorsitter van die Justice Project South Africa (JPSA), het Vrydag ’n klag teen Jaca by die Alberton-polisiekantoor aanhangig gemaak omdat hy na bewering art. 68 van die Padverkeerswet oortree het.
Die saak is intussen na die Pretoria-Wes-polisiekantoor oorgeplaas.
“Die klag is soortgelyk in die erns daarvan aan sake soos dronkbestuur, roekelose of nalatige bestuur en bedrog. Dit is nie iets waarvoor ’n eenvoudige boete uitgereik kan word nie,” het Dembovsky in ’n verklaring gesê.
Dembovsky het gesê as die JPSA nie ’n strafregtelike klag teen Jaca gaan indien nie, gaan niemand dit doen nie omdat “cronyism” hier duidelik aan die gang is. “Enige burgerlike wat dieselfde misdaad gepleeg het, sou summier gearresteer en aangekla geword het,” het Dembovsky gesê. “Mnr. Jaca word duidelik gesien as iemand wat weens sy posisie onaanraakbaar en verhewe bo die reg is.”
Dembovsky het gesê Jaca het verlede week die BMW Z4, wat hy in Mei 2008 gekoop het nadat dit afgeskryf is, vir ’n padwaardigheidstoets by die Randburg-toetssentrum geneem. Daarna het hy dit by die Mabopane-toetssentrum, in die noorde van Pretoria, geregistreer en gelisensieer. Hy het ook die nommerplaat BALTY GP geregistreer.
Kapt. Pinky Tsinyane, Gautengse polisiewoordvoerder, het bevestig ’n saak van bedrog is teen Jaca aanhangig gemaak. Volgens Tsi-nyane sal Jaca se verklaring verkry en die dossier na die direkteur van openbare vervolging gestuur word vir beslissing oor vervolging.