Padverkeerskorporasie gooi miljoene in water

Die Padverkeerbestuurskorporasie (RTMC) het onder leiding van mnr. Ranthoko Rakgoale, geskorste uitvoerende hoof, minstens R144 miljoen in die water gegooi.

Wanbestuur en die onregmatige toekenning van tenders en dienskontrakte was algemeen.

Die RTMC het ook R300 miljoen se eNaTIS-transaksie­gelde onregmatig gebruik om sy uitgawes te dek in plaas daarvan om dit aan die departement van vervoer te betaal.

Mnr. S’bu Ndebele, minister van vervoer, het in Februarie ’n taakspan aangestel om bewerings van wanbestuur en die misbruik van geld te ondersoek.

Rakgoale en nog drie RTMC-werknemers is intussen geskors.

Ndebele het gister die bevindings van die taakspan se verslag op ’n mediakonferensie in Pretoria bekend gemaak.

Die wanbesteding sluit ’n onregmatige huurooreenkoms van R658 miljoen vir ’n tydperk van tien jaar in.

Dié ooreenkoms is intussen gekanselleer en die uiteindelike verlies was R11 miljoen.

Die taakspan het bevind die regte prosedures vir internasionale reise, onder meer dat toestemming van die departement van vervoer verkry moet word, is nie gevolg nie.

’n Amptenaar het Australië toe gevlieg, een nag daar geslaap en teruggekom, terwyl die vergadering wat hy/sy sou bywoon ’n week lank geduur het, het me. Riah Phiyega, voorsitter van die taakspan, gesê.

Sommige werknemers het dokumente wat die taakspan in sy ondersoek gebruik het, probeer steel.

Rakgoale kry intussen elke maand sy salaris. Mnr. Collins Letsoalo, die RTMC se waarnemende uitvoerende hoof, het gister gesê mens is onskuldig totdat jy skuldig bewys word en dat Rakgoale deur die regte menslikehulpbron-prosedures moet gaan.

Ndebele het bygevoeg tugstappe kan nou, in die lig van die bevindings, gedoen word. Volgens die departement kan strafregtelike aanklagte en siviele eise die skuldiges in die gesig staar, maar geen besonderhede hieroor is bekend gemaak nie.

Die RTMC is gestig om strategiese beplanning ten opsigte van padverkeerkwessies op nasionale, provinsiale en plaaslike regeringsvlak te koördineer. Een van sy take is om die Wet op die Administratiewe Beregting van Padverkeersmisdrywe (Aarto) toe te pas.

Dié omstrede verkeerswet, wat al geruime tyd in Johannesburg en Pretoria toegepas word, sou op 1 November landwyd in werking gestel word. Dit is egter tot 1 April volgende jaar uitgestel.

Soveel geld is verkwis:

• IT-infrastruktuur onregmatig gekoop (vermorsing van R11 miljoen);
• 'n Aanmeldingstelsel vir ongelukke onregmatig gekoop (R65 miljoen);
• Tender toegeken vir ’n hulpbronbeplanningstelsel vir ondernemings wat nie gebruik word nie (R34 miljoen);
• Oorbesteding by provinsiale werksessies (R3 miljoen);
• Oorbesteding by ’n internasionale konferensie in Kaapstad (R9 miljoen);
• Ongemagtigde aankoop van kantoormeubels (R1,2 miljoen);
• Diensverskaffers onregmatig aangestel om waar te neem vir onbekwame personeellede in die finansiële eenheid (R13,3 miljoen); en
• Kontrakte onregmatig toegeken vir ’n IT-hulptoonbank en internetbestuurstelsel, evaluering van elektroniese voertuigidentifikasie-tegnologie en “professionele dienste” (R17,5 miljoen)