Panjo: ‘Ons is nou weer ’n familie’
2010-07-29 22:31
Groblersdal. – “Ons is nou weer ’n familie.”
So het die Fernandes-gesin gister gesê terwyl hulle hul tier Panjo sagkuns gestreel en liefkoos het.
Terug by sy huis op die Jugomaro-wildplaas in Groblersdal het dié 18 maande oue Bengaalse tier gister vir tientalle
mediafoto’s geposeer terwyl hy aan sy melkbottel gesuig het.
Panjo is eergisteraand op die R25 sowat 40 km van Bronkhorstspruit en 10 km van die Verena-plakkerskamp gevind nadat hy Maandagaand uit
mnr. Goosey Fernandes se bakkie ontsnap het.
Fernandes se seun, Justin (23), het gesê Panjo was so uitgehonger ná die twee dae dat hy by sy tuiskoms sowat 25 kg en gister ’n verdere 15 kg vleis opgevreet het.
Hy het met Panjo gespeel waar die jong tier, duidelik uitgeput, op die grasperk voor die plaashuis gelê het.
“Panjo het gisteraand eers sy melk gedrink voordat hy op die bank in die TV-kamer aan die slaap geraak het.”
Panjo, wat klein skraapmerkies op die gesig, regterpoot en -skouer opgedoen het, is ook met sy agt jack russell-vriende verenig. Hy sal van vandag weer in sy hok van 100 m by 50 m, omhein met elektriese draad en wat ’n swembad, slaapgrot en speelgoed bevat, slaap.
“Hierdie is sy stukkie hemel op aarde. Volgens natuurbewaringstandaarde behoort sy hok 20 m by 5 m te wees, maar ons het dit veel groter gemaak, want ons gaan binnekort vir hom ’n maat kry en met teling begin,” het Justin gesê.
Mnr. Fernandes het gesê hy het wel geldige permitte vir sy groot kat. Hy is egter deur die Marble Hall-polisiekantoor (Limpopo) met R1 500 beboet weens die vervoer van Panjo oor die Limpopo/Mpumalanga-provinsiegrens ingevolge die Wet op Vervoerpermitte van Wilde Diere. “Ek sal die vervoerpermit baie vinnig uitsorteer,” het mnr. Fernandes gesê.
Mnr. Fernandes het gesê hy is “ongelooflik lief vir my kietiekat” en dat hy Panjo eers “’n lang ruk gesoen en gedruk het” toe hulle by die huis aangekom het.
“Ons kry binnekort drie tiere en ’n drie weke oue wit wyfietier, wat Panjo se teelmaat gaan wees.”
Panjo self is op drie weke by ’n teelplaas in Zeerust aangekoop nadat sy ma hom verwerp het omdat hy “sieklik” was. “Panjo is ons kind. Noudat hy tuis is, is ons weer ’n familie.”
Mnr. Fernandes se vrou, Rose, het gesê hulle is steeds oorweldig deur al die oproepe van ondersteuning van oor Suid-Afrika heen en tot so ver as Engeland.
“Daar is veral belangstelling onder kinders wat vir Panjo wil kom kuier. Ons is so dankbaar aan almal wat kom help soek het en in ekstase dat hy gevind is.”
Die Springs-veearts waarheen Panjo sou gaan vir sy laaste inentings en opsporingstelsel toe hy vermis geraak het, sal hom in Groblersdal kom besoek, het mnr. Fernandes gesê.
“Ek sal nie weer die kans vat om hom Springs toe te neem nie.”
Tiermelk! Panjo lê weg aan ’n bottel melk kort ná sy tuiskoms eergisteraand by sy “gesin”, die Fernandesse. Links is Justin (23), sy ma, Rose, en sy pa, Goosey (met die bottel).
Foto: Denvor de Wee
