Parlement bekyk nuwe bewyse oor kontrak vir wapens

Kaapstad. – Die parlement het die regering se omstrede multimiljardrand-wapentransaksie weer op sy sakelys geplaas en gaan aanstaande maand vier dae afstaan om omstrede nuwe bewyse, dokumente en getuienis te oorweeg.

Dit kan daartoe lei dat vername rolspelers in die sluiting van die wapenkontrakte, insluitend oudpres. Thabo Mbeki en mnr. Mosiuoa Lekota, ’n voormalige minister van verdediging, geroep kan word om voor parlementslede te verskyn.

Mnr. Themba Godi, LP van die African People’s Convention en voorsitter van die staande komitee oor openbare rekeninge (Skoor), het bevestig die wetgewer sal volgende maand ’n lywige voorlegging van die sakeman dr. Richard Young oorweeg.

“Dit wat Young aan die parlement voorgelê het, is nuwe inligting. Ons gaan bepaal in watter mate dit die kwessie vorentoe kan neem en sal ons laat lei deur die bewyse wat voorgelê word.”

Young, wie se maatskappy CCII Systems die tender vir die vloot se nuwe korvette verloor het, het verlede jaar ’n verslag aan Skoor oorhandig waarin beweer word die ouditeur-generaal, openbare beskermer en die nasionale vervolgingsgesag het bevindings van die gesamentlike ondersoekspan bekook.

Hy grond dié bewerings op dokumente wat nie in 2000, toe die ondersoekspan die wapentransaksie ondersoek het, beskikbaar was nie. Mbeki, Lekota en mnr. Trevor Manuel, nou beplanningsminister, word betrek.

Volgens ’n ontleding van Young se verslag deur die DA is die ondersoekspan se voorlopige bevindings deurspek van aanpassings, uitlatings en veranderings.

Handgeskrewe aantekeninge deur iemand waarvan die identiteit nie bekend is nie, kom oral voor, terwyl die name van Mbeki, Manuel en Lekota in kantlyne gekrap staan.

Van die vername aanpassings sluit in:

• Die bevinding dat daar “beduidende leemtes” in die aanwysing van BAE en SAAB as voorkeurkontrakteurs vir die aankoop van vegvliegtuie is, is heeltemal weggelaat;
• ’n Afdeling oor wyses waarop mnr. Joe Modise, ontslape voormalige minister van verdediging, die BAE/SAAB-tender beïnvloed het, is heeltemal weggelaat;
• Die OG se ganse bevinding oor die proses rondom die BAE/SAAB-tender word omgekeer. Pleks van ’n bevinding oor ministeriële inmenging en bevoordeling lui dit die proses was bo verdenking en daar is “geen gronde” vir agterdog nie.