Parlotones gekap oor WB-liedjie vir Duitsers
2010-06-16 23:46
Die Parlotones, een van die land se grootste musiekgroepe, het heftig teruggekap ná ’n berig wat hulle daarvan beskuldig dat hulle onpatrioties is.
In ’n artikel getiteld “Parlotones laat Suid-Afrika in die steek en ondersteun Duitsland” op die webwerf 2oceansvibe.com skryf blogger Seth Rotherham die groep se nuwe Duitse webwerf (the-parlotones.de), laat dit lyk of hulle midde-in WB 2010 die Duitse sokkerspan ondersteun.
Volgens Rotherham is die lirieke “Come back as heroes” in hul nuwe liedjie gemik op die Duitse sokkerspan.
“Om hulself by ’n ander nasie te skaar en vir dié se oorwinning te sing gedurende ’n toernooi wat in hul tuisland gehou word en waaraan hul land deelneem, kan die laaste strooi vir hul aanhangers wees,” het hy geskryf.
’n Hewige debat oor die aangeleentheid het ook op Facebook en Twitter ontstaan.
Kahn Morbee, die groep se hoofsanger, het ’n verklaring met die opskrif “Vir ewig ’n Suid-Afrikaner” gesê hy reageer nie normaalweg op “haat” nie, maar omdat sy “patriotisme”, waarvan hy “’n oorvloed het, bevraagteken word”, sal hy sy stem laat hoor.
“Die waarheid is: Ja, ons het ’n temalied vir ’n Duitse uitsaaimaatskappy gemaak, maar dit is ’n feit dat niemand van die Duitse publiek vir ’n sekonde onder die indruk is dat ons hul land bo ons s’n stel nie,” het hy gesê.
“Vir die afgelope twee jaar wat ons Duitsland toe gaan, het ons baie min oor musiek gepraat, maar baie oor Suid-Afrikaanse politiek en ons pragtige land.
“Die liedjie is nie verraad teen ons land nie, dit is net ’n liedjie,” het hy gesê.
2 Oceans Vibe het ’n internetradio- en -TV-stasie ook.
Rotherham het in reaksie op Morbee se verklaring gesê hulle het die groep genooi om gaste op die radiostasie te wees.