Plaaswerker byt vinger af toe twee stry

’n Plaaswerker van Komatipoort in Mpumalanga is die eerste lit van haar pinkie kwyt nadat ’n ander werker dit glo gisteroggend afgebyt het.

Die twee vroue, onderskeidelik 50 en 28 jaar oud, is albei kontrakwerkers op die suikerrietplaas van mnr. Frik Botha. Hy het gesê die twee het vroegoggend in ’n woordewisseling betrokke geraak.

Hulle was saam met sowat 25 ander werkers agterop ’n vragmotor van die Naas-woongebied af op pad na die plaas Kiaatbult op die Strydomblok-pad.

Volgens Botha het die ouer vrou glo aan die jonger vrou gestamp en ’n bakleiery het ontstaan. “Toe hulle by die plaas aankom, het ek net die onaardse geskree gehoor.

“Die ander werkers het die jonge as ‘inja’, wat hond beteken, uitgejou.

“Dit is eers toe dat die vrou vir my sê haar vinger is afgebyt. En hier steek sy haar oop hand na my toe uit en die afgebyte stukkie lê daarin. Die vrou is baie taai. Sy het nie eers ’n traan gepink nie.”

Die polisie het die jong vrou later van die plaas verwyder nadat die ander werkers geweier het om saam met haar te werk.

Die beseerde vrou is in die Shongwe-hospitaal opgeneem, maar haar vinger kon nie gered word nie, het Botha gesê.

Die name van die twee vroue is nie bekend nie.