Polisie se regshoof geskors

Die polisie se hoof van regsdienste is vandeesweek weens bewerings van bedrog geskors.

Supt. Lindela Mashigo, nasionale polisiewoordvoerder, het gister bevestig afd.komm. Lindiwe Mthimkulu is geskors, maar wou niks meer bekend maak nie.

Beeld het verneem Mthimkulu is onder meer departementeel aangekla weens bewerings dat sy staatsvoertuie misbruik het.
Dit is nie bekend wanneer die departementele verhoor sal plaasvind nie.

Mail & Guardian het in Desember 2008 berig die destydse departement van veiligheid en sekuriteit het toe al bevestig dat Mthimkulu aan ’n interne ondersoek onderwerp is.

Die departement wou toe ook nie besonderhede van die ondersoek bekend maak nie.

Bevestiging van dié ondersoek het ná die bekendmaking van ’n verslag gekom wat lui dat die polisie se regsafdeling in ’n gemors is.

“Mthimkulu se bestuurstyl en haar gebrek aan vaardighede is as van die grootste bydraende faktore tot die wanorde in die (regs)afdeling geïdentifiseer,” lui die berig.

Me. Dianne Kohler Barnard, DA-woordvoerder oor polisie, het gister, toe Beeld haar van Mthimkulu se skorsing vertel, gesê dis omtrent tyd.
“Sy (Mthimkulu) het geen begrip van wat die wet is nie.”

Volgens Kohler Barnard hanteer die polisie se regsafdeling, sedert Mthimkulu oorgeneem het tussen 1% en 2% van alle siviele eise wat teen die polisie ingedien word.

“Dié vrou glo dat niemand die reg het om ’n eis teen die polisie in te stel nie. Dít het ’n impak op die land se inwoners, want alle eise word stadig gehanteer.”

Te midde van die herrie rondom haar skorsing het Mthimkulu gister in die openbare galery van die Pretoriase landdroshof gesit waar haar seun op aanklagte van huisbraak met die opset om te steel en diefstal verskyn het.

Mnr. Nkosinathi Melvin Nkululeko Mthimkulu (22) is in Mei verlede jaar aangekeer nadat hy en vier makkers glo op heterdaad betrap is terwyl hulle by ’n huis in Moreletapark, in die ooste van Pretoria, ingebreek het.

Hulle het glo ná ’n skietgeveg tussen hulle en die polisie in hul voertuig gespring en weggejaag.

Ná ’n jaagtog deur die stad is Mthimkulu jr. en nog twee mans in Pretoria-Wes in hegtenis geneem. Twee ander mans het weggekom.

Mthimkulu jr. is sedert sy arrestasie steeds in aanhouding.

Die saak is met twee weke uitgestel.