Polisielid gekap oor tolkery in ET-saak
2012-02-10 22:20
Ventersdorp. – Mnr. Eugène Terre’Blanche se vermeende moordenaar het erken hy het die AWB-leier verskeie kere met ’n ysterpyp oor die kop geslaan terwyl hy geslaap het.
Mnr. Chris Mahlangu (31) het dit gesê terwyl hy op 4 April 2010, ’n dag ná die moord, uitwysings gedoen het, is gister in die rondgaande hof hier getuig. Mahlangu het gesê die minderjarige het die “yster” ná hom gevat en Terre’Blanche daarmee geslaan, het kapt. Mojalefa Nkosi, wat die uitwysings behartig het, getuig.
Mahlangu het destyds aan Nkosi vertel hoe hy en die minderjarige die polisie ná die moord gebel, daaroor gebieg het en aan die polisie verduidelik het waar hulle is.
Die verdediging het Nkosi gekap omdat hy gelyktydig die uitwysings behartig en die tolkwerk gedoen het. Daar is dus niemand anders wie se getuienis sal kan help as daar ’n dispuut is oor wat Mahlangu gesê het nie, het die verdediging gesê.
Die hof het gehoor Mahlangu kan nie Engels lees of verstaan nie en dat die uitwysingsverklaring in Engels was. Nkosi is daarvan beskuldig dat sy Engels swak is en hy doelbewus nie ’n tolk gebruik het nie omdat hy wou skryf “wat hy wou”.
Nkosi het geantwoord dis ’n leuen en dat hy niks van die moord geweet voor die uitwysings nie. Die uitwysingsvorms is nie in Tswana of Sotho beskikbaar nie, het die hof gehoor.
Nkosi het getuig Mahlangu het ingestem om die uitwysings sonder ’n tolk te doen omdat ’n tolk nie beskikbaar was nie.
Hy en Mahlangu het mekaar goed in Noord-Sotho verstaan, hy het alles in dié taal aan hom verduidelik en standaardpraktyk gevolg, het Nkosi getuig.
Sers. Shireen Adams van die Ventersdorp-polisie-aanklagkantoor het gister getuig oor Ma-hlangu se bewerings dat hy voor die moord by geleentheid ’n klag van aanranding teen Terre’Blanche wou gaan indien.
Mahlangu beweer Adams en twee ander polisielede het onder mekaar bespiegel wie die klag moet hanteer. Hulle wou dit glo nie verder neem nie omdat hulle bang was vir die AWB-leier.
Adams het gister ontken dat Mahlangu ooit so ’n klag wou indien. Sy sou dit nie vergeet het nie omdat Terre’Blanche ’n baie bekende figuur in die Ventersdorp-omgewing was, het Adams getuig.
Die verhoor hervat op 10 April.