‘Pretoria moet weg vóór WB’

Die ANC wil finaal van Pretoria se naam ontslae raak nog voordat die Wêreldbekersokkertoernooi in Junie begin.

Daar is “verhaasde gesprekke” met me. Lulu Xingwana, minister van kuns en kultuur, in ’n poging om van Pretoria as die hoofstad se naam ontslae te raak, het die ANC in die Tshwane-streek gister bekend gemaak.

Mnr. Sputla Ramokgopa, ANC-voorsitter in die streek, het op ’n mediakonferensie gesê Xingwana het aangedui sy oorweeg tans die voorstel om die stad se naam te verander en dat haar departement die besluit binne die volgende paar weke bekend kan maak.

’n Bron in ANC het vertroulik aan Beeld gesê die proses is “eintlik van akademiese belang” en dat die proses nou met groot prioriteit deurgevoer sal word.

“Die plan is dat Pretoria se naam iets van die verlede moet wees wanneer die Wêreldbeker-sokkertoernooi afskop.”

Xingwana se besluit sal ’n einde maak aan ’n uitgerekte naamstryd wat groot onsekerheid meegebring het oor wat die stad se wettige naam is.

Pretoria se naam is al etlike jare in die ANC se visier. Dié party het in die verlede telkens benadruk die verandering is ononderhandelbaar omdat Pretoria in die verlede as die bastion van apartheid beskou is.

Ramokgopa het gister bevestig dit beteken die stad en metrogebied sal voortaan as Tshwane bekend staan as Xingwana ten gunste van dié naam is.

Die minister het reeds gewys sy gaan nie op haar laat wag met naamsveranderinge nie toe haar departement in Oktober verlede jaar 42 naamsveranderinge in die Staatskoerant aangekondig het.

Dit het die verandering van Nelspruit na Mbombela, Belfast na eMakhazeni, Waterval-Boven na Emgwenya en Machadodorp na eNtokozweni ingesluit.

Ramokgopa sê die naamsverandering is “relevant” en die proses moet as ’n prioriteitsaak gehanteer word.

Hy het terselfdertyd gesê die koste wat dit gaan meebring, sal deeglik oorweeg word.

“Hoewel dit nodig is, voorsien ’n naamsverandering niemand van water en elektrisiteit nie. Die koste sal dus deeglik oorweeg word.”

Op die vraag of ’n stad en metrogebied met verskillende grense, maar dieselfde naam, nie grootskaalse verwarring gaan meebring nie, het hy gesê: “Nee, dit behoort nie ’n probleem te wees nie. Ek glo daar sal ’n manier wees om onderskeid te tref.”

Opposisiepartye in die Tshwane-metroraad en voorstanders van die behoud van Pretoria se naam meen dat dit ’n ideale middeweg sou wees om Pretoria as die stad en Tshwane as die metropolitaanse munisipaliteit se naam behoue te laat bly.

Mnr. Mack Lewele, direkteur van kommunikasie in Xingwana se kantoor, het gesê hulle sal eers later die week kommentaar kan lewer omdat die minister nou in die buiteland is.

- Beeld