Dié stryd het verlede maand begin toe Tshwane die
Brooks-huiseienaarsvereniging in ’n kennisgewing daarop gewys het dat sy
houthuisies op munisipale padreserwes staan.
Tshwane het die inwoners gemaan om die huisies binne drie dae te
verwyder.
Mnr. Anton Theron, voorsitter van die huiseienaarsvereniging, het
gesê inwoners is uit die veld geslaan aangesien die huisies al vyf jaar gelede
opgerig is.
Die huisies, wat skuiling aan veiligheidswagte bied, is volgens hom
klein, netjies en veral weens Brooklyn se breë sypaadjies in
niemand se pad
nie.
“Ons het sedert die veiligheidswagte aangestel is geen ernstige
misdaadvoorvalle in die omgewing gehad nie. Dit blyk of die toepassing van dié
munisipale regulasie vir die raad belangriker is as die gemeenskap se
veiligheid.”
Die inwoners meen Tshwane se optrede is kleinlik en
moedswillig.
Die vereniging het gevra vir meer tyd om die onwettige strukture te
verwyder en Tshwane het ingestem om nie voor 15 Februarie op te tree nie.
Theron het gesê die vereniging was nie onverantwoordelik nie en vra
om billik behandel te word.
“Die huisies staan al vyf jaar. Wat kan nou so dringend
wees?”
Daar was destyds pogings om by Tshwane goedkeuring vir die huisies
te kry, maar die vereniging het nooit terugvoering gekry nie, het hy gesê.
Vier van die nege huisies is reeds verwyder.
Mnr. Subesh Pillay, Tshwane se burgemeesterskomiteelid vir
stadsbeplanning, het gesê Tshwane het verlede jaar ’n beginselbesluit geneem om
op te tree waar “kleiner oortredings” begaan word.
“Dit is hoegenaamd nie die idee om die inwoners se pogings om
hulself te beveilig, te ondermyn nie. Maar waar trek jy die streep as jy die
huisies oorsien?”
Tshwane het volgens Pillay reeds teen straatsmouse en taxi’s in die
middestad en soortgelyke oortreders in ander woonbuurte begin optree.
Die inwonersvereniging kan by die departement paaie en stormwater
aansoek doen om die strukture goedgekeur te kry, het hy gesê.