R1 miljoen vir kind wat nou in gr. 1 is

Die ouers van ’n kind wat vanjaar met gr. 1 in ’n private skool begin het, sal na raming meer as R1 miljoen nodig hê vir hom of haar om laer- en hoërskool en tersiêre onderrig te voltooi.

Discovery Invest het in ag genome die nuwe skooljaar en stygende onderwyskoste ’n ontleding gedoen om te kyk wat die opvoeding van kinders in private én openbare skole en universiteite ouers in die toekoms uit die sak sal jaag.

’n Kind wat vanjaar in ’n openbare skool begin skoolgaan, sal sowat R133 536 vir laerskool en R192 860 vir hoërskool nodig hê.

As hy ’n private skool bywoon, sal dit onderskeidelik sowat R267 072 vir laerskool en R540 008 vir hoërskool kos.

Wanneer dié kind universiteit toe gaan, sal hy sowat R335 130 vir klasgeld, R157 708 vir verblyf en R44 356 vir boeke nodig hê. Dit is in totaal sowat R537 194.

’n Kind wat vanjaar gebore is en oor vyf of ses jaar skool toe gaan, sal R196 208 vir sy openbare laerskool-onderrig en later R283 375 vir ’n openbare hoërskool-onderrig nodig hê.

Dié kind se tersiêre onderrig sal na verwagting in totaal sowat R789 314 kos.

Mnr. Kenny Rabson, uitvoerende adjunkhoof van Discovery Invest, sê ouers moet so vroeg moontlik voorsiening vir hul kinders se onderrig begin maak.

Hy verduidelik dat vir elke R10 000 wat in 2002 vir onderwys betaal is, die bedrag vanjaar sowat R20 000 is.

Die gemiddelde styging in onderwyskoste was oor die afgelope dekade sowat 7,2%.

Dit verdubbel as’t ware die bedrag geld wat vir onderwys nodig is oor ’n periode van tien jaar.