Radioman Josie pleeg selfmoord
2012-01-23 22:32
- Artikelopsies
- Deel
- Kry Beeld op
Een van twee werknemers van Radiokansel wat ’n selfmoordpakt aangegaan het, het die naweek selfmoord gepleeg nadat die ander een nie daarmee wou voortgaan nie.
“Sorrie vir almal. Ek’s klaar met die lewe, moet nie verder bel asb,” lui die laaste SMS wat Josie Raath, omroeper van Radiokansel en regisseur van dié stasie se aktualiteitsprogramme Goeie Nuus Tyd en Spektrum, Saterdag aan sy geliefdes gestuur het voordat hy vermoedelik ’n oordosis pille gedrink het.
Raath (48) was ’n depressie-lyer. Sy lyk is Sondagoggend in ’n gastehuis in Margate, KwaZulu-Natal, gevind. Hy het die afgelope vyf jaar vir dié radiostasie gewerk.
Die ander lid van die pakt was me. Christa Petersen Johnson, dogter van dr. Roelf Petersen, uitvoerende hoof van die stasie. Sy het haar luidens ’n verklaring van Radiokansel Vrydagoggend aan dié pakt onttrek.
Me. Marthie Duvenage, kommunikasiebestuurder van Radiokansel, het in die verklaring bevestig dat Raath en Johnson saam wou selfmoord pleeg.
Johnson wou nie gister kommentaar lewer nie.
Raath het verlede Maandag per SMS bedank. Volgens Duvenage het Raath geen redes vir sy bedanking verstrek nie.
Sy het gesê Radiokansel se bestuur is nog in die duister oor die redes vir Raath se optrede.
“Van sy kollegas en vriende meen dat die onlangse verbrokkeling van sy verlowing die hoofrede was,” het Duvenage
gesê.
Luidens ’n berig wat eergister in Sondag verskyn het, het Raath gesê Radiokansel “het sy liefde vir Jesus gesteel”. Hy het sy ontevredenheid uitgespreek oor nepotisme by die stasie.
“Ek gaan my eie lewe neem. Radiokansel het die Jesus wat ek ken met nepotisme, korrupsie en skynheiligheid vernietig,” het hy luidens die berig gesê.
Duvenage het egter gesê elke personeellid word volgens ’n streng aanstellingsbeleid en op meriete aangestel, ongeag of die kandidaat familie by dié radiostasie het.
Raath het ook in die berig
gesê dat dit nie net Radiokansel is wat hom tot selfmoord dreig nie, maar ook ’n vrou met die naam van me. Katryn le Roux.
Volgens Duvenage het Raath ’n lang geskiedenis van emosionele probleme gehad, wat sy verhoudinge binne en buite werkverband beïnvloed het.
Me. Ina Snyman, ’n jare lange vriendin van Raath, was een van die laaste mense wat met Raath gepraat het.
“Hy het my Saterdag omstreeks 18:30 gebel en my ingelig dat hy sy eie lewe gaan neem,” het Snyman gesê.
“Hy was baie depressief en wou nie meer aangaan met die swaarkry van hierdie lewe nie.”
Raath word oorleef deur sy drie kinders.