Renoster-plan eindig tragies

Kromdraai. – ’n Desperate poging om renosters teen stropers te beskerm, het gister tragies geëindig toe ’n 12-jarige renosterbul gevrek het kort nadat gif tydens ’n demonstrasie in sy horings ingespuit is.

“Ons is platgeslaan. Spencer wou net nie opstaan nie,” het dr. Charles van Niekerk, veearts wat die teenstropingsdemonstrasie by die Renoster-en-Leeupark aan die Wes-Rand gedoen het, gesê.

Mnr. Ed Hern, eienaar van die park, het gesê hy is gebroke oor Spencer se dood, maar “desperaat” om die land se renosters te help beskerm.

Hy en Van Niekerk het die middel – ’n mengsel van parasitiese gif en kleurstof – ontwikkel en dit reeds met welslae in die horings van die agt ander renosters op die reservaat gespuit.

Die doel is om stropers en voornemende kopers van renosterhoring af te skrik.

Dit is egter nie ’n prosedure wat deur die regering of bewaringsorganisasies ondersteun word nie.

Spencer is gisteroggend vanuit ’n helikopter met ’n doofpyl geskiet terwyl hy in die veld saam met nog renosters gehardloop het. Die renosterbul het, nadat die pyl hom getref het, ’n paar draaie gehardloop en snorkend op die grond neergeval.

Hy is geblinddoek en sy ore is vol watte geprop om geluide uit te skakel.

Terwyl Spencer op die grond gelê het, het hy geruk en gebewe. Hy het harde kreungeluide gemaak terwyl Van Niekerk gate in sy twee horings geboor en die gif daarin gepomp het. Volgens Van Niekerk was hierdie reaksie normaal.

Hy vermoed egter die renosterbul was nie baie diep onder verdowing nie, maar hy meen die dier het geen pyn ervaar nie.

’n Mikroskyfie is in Spencer ingeplant en DNS-monsters is ook van sy horings geneem.

Ná 20 minute het 12 mans Spencer omgedraai om te voorkom dat hy versmoor. Daarna is die renoster met ’n wakkermaakmiddel ingespuit. Hy het erge sametrekkings gekry, vlak asemgehaal en sy bloeddruk het gedaal.

Die toeskouers is gevra om die gebied onmiddellik te verlaat. Lede van die Rhino Resque Project (RRP) het vyf minute later bevestig Spencer het nie die demonstrasie oorleef nie. Hy het vermoedelik ’n hartaanval gehad.

Dr. Joseph Okori van die Wêreldnatuurfonds (WWF) se renosterprojek het gesê hy is geskok oor die voorval, maar dit was “duidelik ’n desperate poging” om die land se renosters te probeer beskerm.

Van Niekerk het gesê daar is altyd risiko’s wanneer ’n dier verdoof word. ’n Nadoodse ondersoek sal gedoen word.

Hy het beklemtoon hul program sal voortgaan.

“As ons nou ophou, het die stropers wéér gewen.”
 

Spencer, kort nadat hy op sy ander sy omgedraai is om te voorkom dat hy versmoor. Me. Lorina Hern, mede-eienaar van die Renoster-en-Leeupark (voor) sit hand by. Op die voorgrond is dr. Charles van Niekerk, wat die gif in die horing ingespuit het. Foto’s: Nelius Rademan


Gate word in Spencer se horings geboor.