Rowers smul wyl egpaar op vloer lê
2010-07-14 22:30
Terwyl ’n egpaar drie uur lank op ’n koue kombuisvloer vasgebind op hul mae gelê het, het twee rowers aan wors en koeldrank uit hul yskas gesmul.
Mnr. Callie Ferreira (52), wie se ribbe gekraak is nadat een van die rowers hom met ’n paal op sy rug geslaan het, het gister vertel hoe die twee rowers hom en sy vrou, Tina (48) verlede Woensdagaand in hul huis op die Uitzicht-hoewes in Kameeldrift-wes, Pretoria, oorval het.
Die egpaar is aangeval net vyf dae nadat nadat mnr. Ferreira, ’n tegnikus, uit diens gestel is by ’n maatskappy wat veiligheidstelsels installeer.
Mnr. Ferreira het omstreeks 22:00 die veiligheidshek van die kombuisdeur oopgemaak om sy twee boelterriërs uit te laat.
Mev. Ferreira het op die bank voor die TV gelê en slaap.
“Ek het iets agter my gehoor. Toe ek omdraai, was die twee klaar in die huis,” het mnr. Ferreira gesê.
Een het ’n vuurwapen gehad terwyl die ander een ’n houtpaal in sy hand gehad het.
“Ek wou die een takel, maar toe slaan die ander een my met die paal op my rug. Ek het neergesak en geskree.”
Mev. Ferreira het intussen wakker geword.
Die rowers het haar na haar man, wat op die kombuisvloer gelê het, geneem en albei se hande met skoenveters agter die rug vasgebind.
Die rowers het die huis toe begin plunder.
Volgens mnr. Ferreira het hulle geld, vuurwapens, ’n rekenaar en drank bly vra.
“Ná daardie eerste hou het ek elke oomblik verwag hulle gaan ons skiet. ’n Mens kon nooit sien wat hulle doen nie. Ons het net gebid, want daar is niks anders wat jy kan doen nie.”
Terwyl die Ferreiras op die kombuisvloer gelê het, het die rowers wors geëet en koeldrank gedrink wat in die yskas was.
Ná drie uur het hulle die egpaar in hul slaapkamer ingedwing en hulle in die huis toegesluit.
Mnr. Ferreira het sy vrou se skoenveters losgebyt. Sy het hom losgemaak en hy het geskree.
Sy buurman het wakker geword en die polisie gekontak.
Ao. Louis de Bruin, polisiewoordvoerder, het gesê niemand is nog gearresteer nie.