Ruben Kruger sterf

Amy Johnson

Kaapstad - Die voormalige Springbok- en Bulls-flank Ruben Kruger (39) het sy jarelange stryd teen kanker verloor.

Kruger is gisteraand oorlede.

Dokters het in 2000 'n breingewas by hom diagnoseer en in 2007 en 2009 het hy breinoperasies ondergaan waartydens gewasse verwyder is.

Hy het van 1993 tot 1999 as Springbok-flank uitgedraf en was deel van die seevierende Wêreldbeker-kampioenspan van 1995.

Kruger is ook in 1995 as Saru se speler van die jaar aangewys.

Hy het 36 keer vir die Bokke uitgedraf en sewe drieë gedruk.

Aan die einde van sy rugbyloopbaan het hy 'n kameraverkoopsman geword en het 'n Minolta-franchise in Pretoria besit.

Kruger laat sy vrou Lize en twee dogters Zoë (7) en Isabella (4) agter.

'n Aanhanger op sy Facebook-blad skryf: " Jammer oor sy afsterwe...ons weet jy is nou op 'n beter plek sonder lyding en pyn! Dankie vir die voorbeeld wat jy gestel het! Rest in peace".

– Nuus24