SA vrou in tronk in Venezuela

Dit gaan glo só sleg met ’n siek Suid-Afrikaanse vrou in ’n tronk in Venezuela dat sy nie meer weet waar sy is nie.

“Sy verbeel haar sy is tuis, gaan werk elke dag en het haar 17-jarige seun by haar,” het ’n vriendin van me. Zenolia du Plooy (42) gister telefonies vanuit die tronk gesê.

’n Pretoriase prokureur wil nou in ’n toetssaak veg dat die Suid-Afrikaanse konsulaat in Venezuela gelas word om toe te sien dat Du Plooy dringend mediese hulp kry, toetse ondergaan en die regte medisyne kry sodat haar toestand kan stabiliseer.

Haar prokureur, me. Annelize Joubert, bring dié dringende aansoek vandeesweek in die hooggeregshof in Pretoria.

Du Plooy is ’n jaar gelede tot agt jaar tronkstraf gevonnis nadat 799 g kokaïen by ’n lughawe in Venezuela by haar gevind is. Sy beweer Nigeriërs het die kokaïen in haar sak gesit.

Sy ly aan sistemiese lupus, ’n ongeneeslike, chroniese siekte wat met die regte behandeling beheer kan word. Praktiese probleme om Du Plooy se chroniese medikasie van Suid-Afrika by haar in Venezuela te kry het veroorsaak dat haar toestand intussen baie verswak het, het Joubert gesê.

Die departement van internasionale verhoudinge en samewerking gee glo ook nie hul samewerking nie. Die departement het teen druktyd nie op versoeke om kommentaar gereageer nie.

Du Plooy se regspan hoop sy sal, met die nodige mediese verslae, mediese kwytskelding van die hof in Venezuela kan kry en as ’n vry mens na Suid-Afrika sal kan terugkeer.

Me. Monica Botha het gister gesê Du Plooy is onlangs erg aangerand en beroof van alles wat sy by haar gehad het.

- Beeld