Sakelui rol moue op vir naam-stryd

Inwoners en sakelui se moue is opgerol vir die geveg om ’n besluit om Nelspruit se naam na Mbombela te verander, te laat herroep.

Van môre gaan die Lowveld Chamber of Business and Tourism (LCBT) ’n grootskaalse petisieveldtog van stapel stuur in ’n poging om die naamsverandering te beveg.

Nelspruit se naam is ondanks geweldige plaaslike teenkanting in Oktober verlede jaar na Mbombela verander.

Die gebruik van dié naam is uitgestel omdat Fifa gesê het die gebruik van die nuwe naam sou tydens WB 2010 tot verwarring lei.

Daar is intussen stil-stil begin om die naam te gebruik.

“Ons wil nie graag met regstappe dreig nie, maar ons sal dit as laaste uitweg doen,” het mnr. Nic Elliot, president van die sakekamer, gesê.

“Tot tyd en wyl ons nie alle moontlike weë gevolg het om die naamsverandering behoorlik deur te trap nie, sal ons dit eenvoudig nie aanvaar nie.”

Verskeie gesiene ANC-lede, wat anoniem wil bly, het gister gesê hulle steun die kamer se veldtog.

“Ongelukkig kan ons as ANC-ondersteuners nie ons mening amptelik daaroor lug nie, maar ons gaan die petisie vir seker onderteken,” het ’n bekende voormalige politikus van die party in Mpumalanga gister aan Beeld gesê.

Volgens hom hoop die sakekamer om die regering met die protesaksie te dwing om die naam Mbombela te deproklameer.

Die sakekamer beoog om vandeesweek met ’n deur-tot-deur-veldtog te begin om handtekeninge in te samel.

Tot die skole gaan betrek word, het Elliot gesê.

“Ons het me. Lulu Xingwana (minister van kuns en kultuur) verlede jaar al genooi om Nelspruit te besoek om haar van die teenstand teen die verandering te vergewis.

Ons het geen beswaar dat die munisipaliteit Mbombela genoem word nie, maar ons kan nie toelaat dat die hoofstad en die stadsraad dieselfde naam het nie.

“Nelspruit is net deel van die groter Mbombela-metro, net soos Witrivier en Hazyview deel daarvan is.”

Volgens Elliot is die proses wat sedert 2008 gevolg is om die naam te verander, heeltemal onvoldoende.

Die inwoners en sakelui is gefrustreerd deur die prosedures wat die taakspan wat die naamsverandering hanteer het, gevolg het.

“Ons reken dat net ’n baie klein groepie mense, van wie die meeste nie eens van Nelspruit afkomstig is nie, se bydraes en stemme gebruik is om die naamsverandering deur te druk.”

Elliot het gesê die sakekamer meen ook daar is geen grondige rede om Nelspruit se naam te wil verander nie.

“Nelspruit se naam is nie rassisties of afstootlik nie en het geen politieke konnotasie nie.”

Die miljoene rande wat bestee is om Nelspruit tydens WB 2010 te bemark, sal vermors word as die nuwe naam sou voortbestaan, meen hy.