Sersant word eers weer skoonmaker
2010-03-18 23:17
- Artikelopsies
- Deel
- Kry Beeld op
Die hoof van die weermag, genl. Godfrey Ngwenya, gaan vandeesweek opdrag gee dat ’n skoonmaker in die weermag wat byna oornag ’n sersant geword het, voorlopig weer ’n skoonmaker word.
Ngwenya het gister aan Beeld gesê die skoonmaker sal weer ’n skoonmaker word totdat ’n raad van ondersoek bepaal het hoe haar meteoriese bevordering gebeur het.
Volgens Ngwenya lyk dit op die oog af inderdaad asof daar onreëlmatighede in haar aanstelling was.
Hy wil hom vergewis van hoe dit gebeur het en wie daarvoor verantwoordelik is.
“Hoër gesag moet gewoonlik sulke aanstellings goedkeur. Ons moet bepaal wie presies by haar aanstelling betrokke was en hoe dit toegelaat kon word,” het Ngwenya gesê.
Hy hou persoonlik ’n ogie oor die ondersoek.
Die ondersoek is ingestel nadat Beeld onlangs navraag gedoen het oor hoe dit moontlik is dat me. Mmaluka Louisa Flo-rence Mgcina (38), wat sedert 2007 as skoonmaker in die weermag gewerk het, in Desember verlede jaar ’n sersant geword het.
Ontstoke mede-sersante van Mgcina het die bevordering onder Beeld se aandag gebring nadat hul eie navrae op dowe ore geval het.
Sy is in Desember aangestel terwyl heelwat soldate en senior offisiere met verlof was.
Sy het onmiddellik die volle voordele van ’n sersant – insluitend 100% medies – ontvang, hoewel sy net matriek het.
Sy het géén militêre agtergrond of bykomende kwalifikasie nie.
Kort ná haar “aanstelling” is verskeie van haar voormalige skoonmakerkollegas se kontrakte beëindig. Hulle meen haar rangaanstelling hou dalk daarmee verband en dat sy geweet het dié kontrakte gaan beëindig word.
Ervare onder-offisiere wat elke moontlike kursus gedoen het om sersante te word, het gesê gevalle soos dié maak hulle moedeloos oor hul loopbaanmoontlikhede.
Mgcina het in 2007 teen R3 603 per maand as skoonmaker vir die weermag begin werk. Teen Desember verlede jaar het sy R4 593 per maand verdien, maar toe word sy as lid van die Staande Mag in die pos van “militêre raadgewer” aangestel met ’n salaris van R10 182.
Sy sou later vanjaar ondanks haar ouderdom eers haar basiese opleiding moes ondergaan.