Bobby van Jaarsveld het eers gedink hy hoor
verkeerd toe hy as die plaaslike Cosmopolitan se sexyste man van
die jaar aangewys is.
Lesers van die vrouetydskrif het 13 mans benoem vir die titel en
kon dan per SMS vir hul gunsteling stem.
Van Jaarsveld (24) het die
meeste stemme gekry en eergisteraand
weggestap met die titel, R10?000 en ’n trofee in die vorm van ’n man se
bolyf.
“Dis wonderlik,” het hy gister aan Beeld gesê terwyl
hy verleë gelag het.
“Toe hulle praat van ’n sanger, het ek nie dadelik besef hulle
praat van my nie. Hulle moes weer ’n keer vir my sê ek het gewen.”
Onder Van Jaarsveld se mededingers was die Survivor:
Maldives-deelnemer Lukhanyo Nontshinga, die Top
Billing-aanbieder Janez Vermeiren en die sewes-rugbyspelers Neil Powell en
Chris Dry.
Gelukwensing van sy ondersteuners het op sy Twitter-profiel
ingestroom ná die aankondiging. Sy suster, Karlien, en sangers soos Sarah Theron
en Johan C. Venter was van die eerstes wat hom gelukgewens het.
“Mooi van binne en buite,” het sy ma en agent, me. Ronel Brink,
getwiet.
Van Jaarsveld en sy vrou, Annatjie, se seun, Sion, is nou drie
maande oud en die sanger sê hulle slaap nie veel nie. Nietemin maak hy seker hy
kom drie keer ’n week in die gimnasium en let op wat hy eet, veral wat stysel en
suiker betref..