Skare slaan twee ‘booswigte’ dood
2012-02-06 22:03
- Artikelopsies
- Deel
- Kry Beeld op
Twee mans is doodgeslaan en nog twee ernstig beseer nadat ’n groep inwoners van Diepsloot, noord van Johannesburg, gister eie reg gebruik het.
Lt.kol. Katlego Mogale, Gautengse polisiewoordvoerder, het gesê ’n groep inwoners van Diepsloot uitbreiding een het kort ná middernag na uitbreiding nege gegaan op soek na ene Blessed, wat hulle beweer ’n verkragter is.
By sy huis het hulle ’n ander man gekry wat hulle as ’n huisrower herken het.
“Die groep het dié man aangerand en het hom beveel om sy makkers uit te wys,” aldus Mogale.
Die man het hulle na uitbreiding 12 geneem waar hy drie mans uitgewys het.
Die groep het al vier mans aangerand.
“Twee mans is in die aanval dood en die ander twee is ernstig beseer.”
Mnr. Robert Mulaudzi, woordvoerder van die Johannesburgse nooddienste, het gesê die nooddienste is gisteroggend na Diepsloot uitgeroep.
“Twee van die mans is dood terwyl ons hulle behandel het. Hulle het erge kop- en nekbeserings gehad.”
Die ander twee mans het volgens hom soortgelyke beserings opgedoen, maar het die aanval oorleef.
Hulle is na die Tembisa-hospitaal geneem waar albei teen gistermiddag in ’n bedenklike, maar bestendige toestand was.
Mulaudzi het gesê al vier mans is tussen 20 en 30 jaar oud.
Volgens Mogale is twee mans reeds weens die aanval in hegtenis geneem.
“Ons het ’n 34-jarige man in Diepsloot gearresteer en ’n 36-jarige man het by die Diepsloot-polisiekantoor opgedaag en homself aan die polisie oorgegee.”
Mogale kon nie sê hoeveel mense by die aanval betrokke was nie.
Die polisie ondersoek aanklagte van moord, poging tot moord en ontvoering.
Die gearresteerdes sal môre in die Randburg-landdroshof verskyn.