Skolier verdrink voor sus en swaer in die Vaaldam

Waterpret in die Vaaldam het tragies geëindig toe ’n hoërskoolseun van Johannesburg voor sy suster en swaer verdrink het.

André Joubert (18) en sy suster, me. Nickoll Lourens (23), en haar man, mnr. Theo Lourens, het van Sondag af op ’n plaas naby Villiers langs die Vaaldam gekampeer.

André het gister omstreeks 11:00 op sy Facebook-profiel geskryf: “Sitting next to the vaal catching sum AWSUM sized fish!!!!!!!!!!!!! couldn’t be betta!!!!!!!!!!!!!!!!!!!!!!!!!”

Hy het ’n uur later verdrink.

“Ons het visgevang, maar daar was nie ’n byt nie. André het gesê hy gaan swem,” het mnr. Theo Lourens gister gesê.

André se suster het foto’s van hom geneem terwyl hy die water ingestap en begin swem het.

“Dit het in ’n stadium gelyk of hy water trap. Hy het gesê hy gaan terugswem, want die water is baie koud,” het mnr. Lourens gesê.

André was ongeveer 40 m van die oewer af toe Lourens snaakse geluide hoor.

“Ek het vir hom geskree om te swem en het na die dam gehardloop en my klere uitgetrek om in te spring.

Toe ek weer kyk, was hy weg onder die water. Dit het alles so vinnig gebeur.”

André se suster het hom afgeneem oomblikke voordat hy onder die water verdwyn het.

Lourens het dadelik die polisie en nooddienste ontbied.

Lourens se suster en ouers van Johannesburg het oomblikke later op die toneel opgedaag.

Duikers van Badplaas was gister 18:00 nog op pad na die dam.

André was ’n gr. 11-leerling aan die Hoërskool President in Johannesburg.