Skoppery en houe: Man ná weke vas
2010-08-20 11:14
- Artikelopsies
- Deel
- Kry Beeld op
Die man wat sy gewese vriendin se seun glo so hard “geklap en geskop” het dat dié steeds in ’n ernstige toestand in ’n Wes-Randse hospitaal is, is aangekeer.
Die polisie het mnr. Armand Barnard (37) gister in Krugersdorp in hegtenis geneem nadat hy dae lank belowe het om hom oor te gee.
Barnard se broer, Barry, het Beeld die afgelope naweek gebel om te sê Armand gaan homself Maandag oorgee. Toe dit nie gebeur nie, het hy gesê dit sou dan “beslis” eergister gebeur.
Kapt. Lydia Mtila-Dikolomela, polisiewoordvoerder, het gister gesê die polisie het op wenke gereageer en Barnard in Krugersdorp opgespoor en in hegtenis geneem.
Hy sal na verwagting binnekort in die Roodepoortse landdroshof verskyn op aanklag van aanranding met die doel om ernstig te beseer en diefstal.
Mnr. Christo van Eeden (19), wat aan brosbeensiekte ly en skaars 50?kg weeg, het onder meer skedel- en wangbreuke opgedoen in die aanval twee weke gelede by sy gesin se motorwerkwinkel in Krugersdorp.
Barnard het erken hy het Van Eeden geslaan, maar gesê dit is omdat Van Eeden en dié se broer, Louis (16), “lankal met my skoor soek”.
Volgens me. Tersia van Eeden, ’n weduwee en die seuns se ma, is brosbeensiekte (osteogenesis imperfecta) as babas by hulle gediagnoseer.
Van Eeden en Barnard het ’n jaar lank ’n verhouding gehad.
Volgens haar het hulle die aand voor die aanval stry gekry en sy het gesê hy moet uit haar huis uit.
Barnard het dié aand en die volgende oggend glo aan haar en die twee seuns SMS’e gestuur waarin hy hulle dreig.
Aan Van Eeden het hy onder meer geSMS: “Liefie nou het jy wat jy mos wil hê jou seuntjie vrek vandag.”
Die dag van die aanval was Christo saam met nog twee werkers in die motorwerkwinkel toe Barnard, ook ’n werknemer daar, opgedaag het. Volgens Van Eeden het sy ’n SMS van Christo gekry wat lui: “Armand hier. Bel vir John.”
Sy het mnr. John Pollock, ’n familievriend, dadelik gebel wat hom na die werkwinkel gehaas het. Volgens Pollock het hy Christo in ’n plas bloed aangetref.
“Armand het met die werk se bakkie, ’n wit Nissan, weggejaag.”
Volgens Van Eeden het Christo al sy bewussyn herwin.
“Hy lyk of hy hoor en verstaan wat ons vir hom sê, maar hy kan nog nie praat nie. Dit is steeds nie duidelik of hy ten volle sal kan herstel nie.”