Skuldig nadat man in kroeggeveg sterf

Een man is vry en ’n ander skuldig bevind aan strafbare manslag en aanranding ná ’n kroeggeveg wat tot ’n man se dood gelei het.

Mnre. Christopher Nicola (30) en Carl Andrew Saunders (20) het in die hooggeregshof in Johannesburg elk tereggestaan op een aanklag van moord en twee van poging tot moord.

Saunders was glo op 22?November 2009 in die Ballbreakers Pool Lounge in Fourways, Johannesburg, in ’n onderonsie met ’n man betrokke. Hy is uitgesmyt en het Nicola gebel om te kom help.

Hulle het later buite Ballbreakers weer vasgesit met vriende van dieselfde man.

Mnre. Robert en Gordon Taljaard en Richard Millett-Clay het meswonde opgedoen in dié onderonsie en Millett-Clay is later oorlede.

Regter Haseena Mayat het Nicola Vrydag onskuldig bevind op al drie aanklagte, omdat daar nie bewys is hy het ’n mes gebruik nie. Volgens vroeëre getuienis deur 'n dokter wat die drie mans die aand van die voorval ondersoek het, is al die wonde deur dieselfde mes veroorsaak. Saunders het vroeër erken hy het 'n mes by die ander mans afgeneem en homself daarmee verdedig.

Mayat het Saunders skuldig bevind aan strafbare manslag pleks van moord, aangesien hy volgens haar die oorledene nie opsetlik doodgemaak het nie. Hy is ook skuldig bevind aan twee aanklagte van aanranding pleks van poging tot moord, omdat die Taljaards se wonde slegs oppervlakkig was.

Hy sal in April gevonnis word.