“Sluit jul deure vir ’n paar maande, dan kan julle weer in April
oopmaak wanneer ons geld het om vir julle te gee.”
Dít is die voorstel van die departement van maatskaplike
ontwikkeling in Noordwes aan ’n nie-regeringsorganisasie (NRO) in Hartbeespoort
omdat hulle nie ’n beloofde bedrag van R450?000 kan uitbetaal nie.
Die Johannesburg Parent and Child Counselling Centre se
Hartbeespoort-tak is langs ’n informele nedersetting met 8?000 inwoners geleë,
sê me. Jacqui Michael, die sentrum se direkteur.
“Die naaste ander maatskaplike diens is 50?km weg in Brits. Ons
doen die departement se werk. Ons hanteer die kindermishandelingsake. Ons het
maatskaplike werkers in vyf of ses skole. Ons bedryf ’n kleuterskool met 102
kinders en verskaf maatskaplike dienste aan hul gesinne. Dis almal kwesbare
gesinne waar daar ernstige probleme soos alkoholmisbruik is.”
Die Hartbeespoort-tak is in 1998 gestig en het homself tot 2002
gefinansier. Die tak het toe aansoek gedoen om ’n toelae van die departement. Hy
het sporadiese betalings van R6?000 per maand ontvang, totdat Carte
Blanche oor die situasie berig het. Kort daarna, in Oktober 2008, het die
departement R450?000 aan die tak betaal.
“Toe hulle daardie bedrag betaal het, wou hulle hê ons moes ’n
aparte bankrekening (vir die Hartbeespoort-tak) oopmaak,” sê mnr. Luke Lamprecht
van die sentrum.
Dié bedrag het teen einde 2010 opgeraak en die Johannesburg-kantoor
het ’n paar maande lank uitgawes help dek, met die verstandhouding dat die
Noordwes-regering weer in April verlede jaar R450?000 sou bydra.
Die Hartbeespoort-tak is toe egter gevra om as ’n aparte NRO te
registreer. Dié proses het maande lank gesloer. Die departement het die sentrum
gister ingelig hy het nie meer geld om te gee nie.
Om vir die volgende jaar oop te bly het die tak sowat R600?000
nodig, sê Michael.
“Dit maak nie voorsiening vir uitbreiding van dienste, verhogings
vir ons personeel of ’n voertuig nie.
“?’n Voertuig is aan ons geskenk, maar dit staan by my huis omdat
ons nie die versekering, instandhouding of petrol daarvoor kan bekostig
nie.
“R750?000 sal ideaal wees.”
Michael sê van hul ander weldoeners kan dalk help om die sentrum
tot April aan die gang hou, maar sy is nie seker of die departement dan sal
betaal nie.
Die Noordwes-regering kon nie gister vir kommentaar bereik word
nie.