‘So hartseer’

Die dragtige renosterkoei wat eergister in Limpopo doodgeskiet is en waaroor Beeld gister berig het, het ’n bykans volgroeide kalf in haar gedra.

Mnr. Eddie Vorster, eienaar van die Thiergarten-plaas in die Letsitele-gebied, het gesê die koei sou oor sowat drie weke kalf.

“Dit is verskriklik hartseer om die klein kalf so te sien.”

Hy het gesê die ander koei wat eergister op dieselfde plaas doodgeskiet is, was in 2010 ook ’n slagoffer van stropery.

Sy is destyds gekwes. Die twee koeie is eergister ’n paar meter van mekaar doodgeskiet. Veldwagters het op hulle afgekom. Vorster het gesê hulle het vergeefs op die grond en met helikopters na die stropers gesoek.

Lt.kol. Ronél Otto, polisiewoordvoerder, het gesê die stropers se spore het teenaan die grensdraad by ’n teerpad doodgeloop.

Vier renosters is vandeesweek in Limpopo vir hul horings doodgemaak.

Volgens Vorster is twee renosters ook verlede maand op dieselfde plaas doodgemaak.

Hul horings is ook afgekap.

Landwyd is reeds meer as 30 renosters vanjaar vir hul horings doodgemaak.

Eienaars van private wild­reservate in Limpopo het onlangs vergader om planne te bespreek oor hoe om hul renosters te beskerm.

Me. Selomie Maritz van die Palala Rhino Sanctuary buite Mookgophong (Naboomspruit) het gesê daar is vrywilligers wat op die plaas in tente woon en renosters “oppas”. Hulle patrolleer die grond om te alle tye te weet waar die diere is.


Dié bykans volgroeide renosterkalf is ook dood toe sy ma op ’n plaas in Limpopo vir haar horings doodgemaak is. Foto: Eddie Vorster