Sokker-soustrein loop
2010-06-14 22:14
- Artikelopsies
- Deel
- Kry Beeld op
Kaapstad. – Die sokker-soustrein loop lekker en op volspoed.
Dit het gister aan die lig gekom beleggers, hooggeplaastes en staatsamptenare word op WB 2010-kaartjies getrakteer waarvoor belastingbetalers al R10,9 miljoen opgedok het.
Vyf staatsdepartemente het in antwoord op geskrewe parlementêre vrae van die DA onthul hulle het 3 321 kaartjies vir verskeie wedstryde bekom, meestal om belangrike besoekers te bederf en as ’n blyk van waardering aan hardwerkende amptenare.
Volgens mnr. Tim Harris, DA-LP, is dit onaanvaarbaar – “veral as ’n mens in ag neem dat duisende Suid-Afrikaners die kaartjies nie kan bekostig nie of dit nie in die hande kon kry nie”.
Dr. Rob Davies, minister van handel en nywerheid, het gister bevestig sy departement het meer as 320 kaartjies ter waarde van R4,7 miljoen gekoop om belangrike buitelandse en plaaslike sakelui te trakteer.
“Die toernooi bied die ideale geleentheid om met beleggers te skakel en beleggingsmoontlikhede te bemark.”
Boonop het Davies, sy adjunk en senior amptenare ook ’n “paar kaartjies” gekry om die “baie belangrike persone” na wedstryde te vergesel.
Mnr. Marthinus van Schalkwyk, minister van toerisme, het ook gister bevestig SA Toerisme het 180 kaartjies teen R919 000 gekoop.
Tot 80 kaartjies is vir “internasionale media, rolspelers en strategiese vennote” en die res is vir amptenare van SA Toerisme “wat drie jaar lank aan dié projek gewerk het”.
Me. Naledi Pandor, minister van wetenskap en tegnologie, het gister gesê haar departement het tien kaartjies teen R25 200 gekoop om uitmuntende werknemers te beloon.
Voorts het die departement van kommunikasie en van staatsdiens en administrasie verlede week in antwoord op parlementêre vrae van die DA gesê ook hulle het onderskeidelik R5,2 miljoen (2 800 kaartjies) en R65 400 (25 kaartjies) bestee.
Die volle omvang van die groot bederf sal waarskynlik eers bekend wees wanneer die ouditeur-generaal sy ouditverslae vir die 2009-’10-boekjaar afgehandel het.
Dit kan nare nagevolge inhou vir die rekenpligtige beamptes wat dit goedgekeur het.
Mnr. Pravin Gordhan, minister van finansies, het munisipaliteite onlangs in ’n omsendbrief gewaarsku die aankoop van sokkerkaartjies met belastingbetalers se geld kan ingevolge die Wet op Openbare Finansiële Bestuur neerkom op finansiële wanbestuur en onregmatige en nuttelose besteding.
Dit is ook strydig met die gedragskode vir staatsamptenare.
Gordhan het Harris verlede week in ’n brief verseker hoewel die omsendbrief nie ook aan nasionale en provinsiale departemente en staatsondernemings gestuur is nie, dieselfde reëls vir hulle geld.